«Дьоруой суолунан» марафон буола турар

Мэҥэ Хаҥалас Сыымах нэһилиэгэр Сэбиэскэй Сойуус Дьоруойа Федор Кузьмич Попов кэриэһигэр «Дьоруой суолунан» спортивнай-патриотическай марафон буола турар.

Марафон кыттыылаахтарын кытта Арассыыйа Дьоруойдара, «Дьоруойдар бириэмэлэрэ» бырайыак кыттыылаахтара Дмитрий Куценко уонна Николай Соболев көрүстүлэр. Тэрээһиҥҥэ маны сэргэ ыччат миниистирин солбуйааччы Александр Максимов кытынна.
«Дьоруой суолунан» спортивнай-патриотическай марафон кыттыылаахтара от охсуутугар, ынах ыаһыныгар уонна кулуһуҥҥа ас астааһыныгар о.д.а. атыҥҥа күрэхтэһэллэр. Тиэрэ үрэҕи харбаан туораан буулдьалаах саанан ытыыга түһүмэх Федор Попов Днепр өрүһү харбаан туораан өстөөхтөрү кыдыйбыт хорсун быһыытыгар ананар.
Марафон бу түһүмэҕэр Бэдьимэттэн Дмитрий Захаров, «Сахатранснефтегаз» АУо маастара, кыайыылаах буолла. 

Санатар буоллахха, Баатара нэһилиэгин ыччаттарын «Дьоруой суолунан» бырайыактара «Муус Устар» ыччат бэстибээлин кыайыылааҕынан тахсыбыта, диэн Ил Дархан уонна Бырабыыталыстыба пресс-сулууспата иһитиннэрэр.