«Дьоруой суолунан» марафон

Мэҥэ Хаҥалас Сыымах нэһилиэгэр Сэбиэскэй Сойуус Дьоруойа Федор Кузьмич Попов кэриэһигэр «Дьоруой суолунан» спортивнай-патриотическай марафон түмүктэннэ.

Марафон кыттыылаахтарын кытта Арассыыйа Дьоруойдара, «Дьоруойдар бириэмэлэрэ» бырайыак кыттыылаахтара Дмитрий Куценко уонна Николай Соболев көрүстүлэр. Тэрээһиҥҥэ маны сэргэ ыччат миниистирин солбуйааччы Александр Максимов кытынна.

«Дьоруой суолунан» спортивнай-патриотическай марафон кыттыылаахтара от охсуутугар, ынах ыаһыныгар, кулуһуҥҥа ас астааһыныгар о.д.а. күрэхтэстилэр. Тиэрэ үрэҕи харбаан туораан буулдьалаах саанан ытыылаах триатлон Федор Попов Днепр өрүһү харбаан туораан өстөөхтөрү кыдыйбыт хорсун быһыытыгар ананар.

Марафон бу түһүмэҕэр Бэдьимэттэн Дмитрий Захаров, «Сахатранснефтегаз» АУо маастара, кыайыылаах буолла.

Ынах ыаһыныгар кыайыылааҕынан Елена Аринкина таҕыста. От охсуутугар Николай Ходулов таҕыста. Кутаа уокка ууну оргутууга олохтоохтор бастаатылар. Аҕа дойду Улуу сэриитигэр аналлаах өй-билии күрэҕэр улуустааҕы социальнай бэлиитикэ управлениетын бэрэстэбиитэллэрэ кыайдылар.

Биэс түһүмэхтээх марафон Кубогын хаһаайыттарынан олохтоохтор – Бэдьимэ нэһилиэгин Сыымах сэлиэнньэтин ыччаттара буоллулар.  

Санатар буоллахха, Баатара нэһилиэгин ыччаттарын «Дьоруой суолунан» бырайыактара «Муус Устар» ыччат бэстибээлин кыайыылааҕынан тахсыбыта, диэн Ил Дархан уонна Бырабыыталыстыба пресс-сулууспата иһитиннэрэр.