Дьоруой Леваковка сурук ааптара көһүннэ-2

Матырыйаал бэлэмнэнэр кэмигэр сурук ааптарын көрдүүрүн биллэрбит Уус Алдан улууһун баһылыга Василий Петрович Алексеев, хомойуох иһин, Тандаҕа улахан умайыы тахсан, онно барбыт этэ. Онон кыайан сибээстэспэтэхпит.

Киэһэ хойутуу, сибээс хабар сиригэр кэлбитигэр эрийэн, сурук ааптара ким буолара биллибитин этэн баран, учуутал Малышева А.В. нүөмэрин биэрбитим.  Субу аҕай Василий Петрович махтанан эрийэ сырытта:

– Хата, Алена Викторовна Владик ийэтин нүөмэрин биэрэн, ылаат да, биидьийэ-сибээһинэн кэпсэтэ сырыттым.  Ийэ барахсан, Виктория Евгеньевна, олус долгуйда, үөрүүтүттэн ытамньыйан да ылла. Уһуннук кэпсэттибит.  Аҕалара СВО-ҕа суох буолаахтаабыт эбит. Сурук ааптарын көрдөспүт, кыттыспыт дьоҥҥо, уолун бастакы учууталыгар, үөрэх кыһатыгар махтанарын тиэртэ.  Уолунуун: “Биһиги долгуйдубут, үөрдүбүт”, – дэһэллэр. Эрийэрбин кэтэспит эбит. Саха сирин, үтүөкэн дьонун олус күндүтүк саныыр. 

Александр Сергеевичка кини нүөмэрин ыыттым.  Бакаа көрө илик. Хайаан да ийэҕэ эрийиэҕэ дии саныыбын. Сурук ааптарын олус көрсүөн баҕарар этэ. Ити суругу  2023 сыл алтынньы-сэтинньи диэки  туппутун кэпсээбитэ. «Бу ким эрэ Саха сириттэн ыыппыт этэ.  Бу сурук миэхэ олус күндү. Үйэм тухары илдьэ сылдьарым буолуо. Кинини буларбар көмөлөһүөҥ дуо? Махтаныахпын баҕарабын», – диэбитэ. Түөһүгэр укта сылдьарын хостоон көрдөрбүтүн хаартыскаҕа түһэрбитим. Соторутааҕыта онтубун санаан кэлэн, ити таһааттарбытым. 

Владик Нездвецкэй Марха оскуолатыгар үөрэммит кылааһын кытта

Эрдэ атын дьон: «Биһиги оҕобут суруга быһыылаах», – диэн тахса сылдьыбыттара. Ол эрээри кинилэр оҕолоро билигин 4-с кылааска үөрэнэр эбит этэ. Оттон биһиги 3 сыллааҕы сурук ааптарын ирдэһэр буоллахпыт. Быһа холуйан  7-с кылаас буолара буолуо диэн сэрэйбиппит. 

– Ээ, өссө оннук эмиэ буолбут эбит дии! «Дом юноармейца» бэлэм кумааҕытыгар  суруйуу буолан, бутуллубут буолуохтарын сөп. Кыраҕы харахтаах учууталлар көмөлөрүнэн дьиҥ ааптар көһүннэҕэ!