Дьоруой Леваковка сурук ааптара көһүннэ!

Онно Александр Леваков анал байыаннай дьайыы саҕаланыыта Саха сириттэн туппут суругун харысхал гынан, күн бүгүнүгэр диэри илдьэ сылдьарын кэпсээбит уонна ааптарын билиэн, булуон баҕарарын үллэстибит этэ. Ол туһунан социальнай ситимнэргэ аахтаххыт буолуо. Сурук ааптара ким буоларын биллибит!

«Киин куорат» сурук ааптара, оччолорго 4 “в” кылаас үөрэнээччитэ Владик Нездвецкэйи  ааҕарга-суруйарга үөрэппит Марха 2-с нүөмэрдээх орто оскуолатын учуутала Алена Викторовна Малышеваны кытта кэпсэтэ сырытта.

Алена Викторовна:

– Үс сыллааҕыта Марха 2-с нүөмэрдээх оскуолатын 4 “а” уонна “в” кылааһын үөрэнээччилэриниин Клара Цеткин аатынан уулуссаҕа турар “Дом Юнармии” диэн эдэр армеецтары бэлэмниир кииҥҥэ бара сылдьыбыппыт. Онно оҕолорбут элбэҕи билэн-көрөн кэлбиттэрэ. Автоматы ыһан-хомуйан көрдөрбүттэрэ, маршировкалаабыттара. Түмүгэр оҕолорго СВО-ҕа сылдьар байыастарга анаан сурук суруйтарбыттара.

Аҕыйах хонуктааҕыта социальнай ситимҥэ ити суругу элэҥэс көрөн аһарбытым. Триггер диэбиккэ дылы, ханна эрэ көрбүт бланкам, билэр уруһуйум курдуга уонна, аны, билэр баҕайы буочарым! Хас биирдии оҕо буочара ураты буолар ээ. Ол эрээри тоҕо эрэ дириҥээн тохтуу барбатаҕым. Дьэ, онтон коллегаларым, завучпут: “Эйиэннэриттэн хайалара эрэ буолуохтаах”, – диэбиттэригэр, оччотооҕу бырайыактардаах докумуоннарбын ылан, буочарын тэҥнээн көрбүтүм, сыыспатахпын – Владигым буочара! Төһөтүн да иһин 3 сыл аастаҕа. Владик миэхэ 1-4 кылаастарга үөрэммитэ. Уол алын сүһүөх кылааһы бүтэрээтин кытта дьиэ кэргэнинэн Саратов куоракка көспүттэрэ.

Онтон ийэтигэр суруйан, чахчы Владик суруга буоларын бигэргэппитэ. Владик бэйэтэ үөрэнэ сылдьара. Бастаан уруһуйун кырааскалаабыт үһү, онтон туга эрэ табыллымына, иккис илииһи ылан, тиэкиһин туһунан суруйбут. Бириэмэтэ тиийбэккэ, ситэрбэккэ хаалбыт.

Владик хаартыскаҕа хаҥас диэки олорор.

Уолчаан билигин Саратовка Олимпийскай резервэ оскуолатыгар 7 кылааска үөрэнэр. Футболга идэтийэн дьарыктанар. Ийэтэ Виктория Евгеньевна этэринэн, кэскиллээх, кэнэҕэскилээх футболист быһыытынан сыаналанар. Тириэньэрэ, Владигы “Зенитка” дуу, ханнык диэтэ дуу, ылар түгэннэригэр, Москубаҕа эбэтэр Санкт-Петербурга көһөр туһунан толкуйдана сылдьалларыгар эппит.

– Тыый, маладьыаһы! Оччоҕуна манна Саратовтан кэлэн олоро сылдьыбыттара дуо?

– Суох, төрүт маннааҕылар ээ. Алын сүһүөх кылааһы бүтэрбитин кэннэ көспүттэрэ. Саратовка олорбут эбэлэрэ кыбартыыра хаалларбыт этэ. Ийэтэ, букатын да, сыыспат буоллахпына, Ньурба улууһуттан төрүттээх эбэтэр онно олоро сылдьыбыттар. Владиктаах бииргэ төрөөбүт иккиэлэр. Ийэ барахсан байыаска сурук туһунан истэн баран, мэктиэтигэр, ытамньыйан ылла. Владик кииринньэҥ аҕата СВОҕа сылдьан сураҕа суох сүппүт эбит...

– Оо. Иһитиннэрии таһаарбыт улуус баһылыга Василий Петровичка эрийэн биллэрдигит дуу?

– “Дом юнармейцев” киинтэн Любовь Петровна эрийэ сылдьыбыта, киниэхэ ийэтин нүөмэрин биэрбитим. Онон туһааннаах сиригэр тиэрдибит, биллэрбит буолуохтаахтар.

– Саратов куорат мөлүйүөҥҥэ эрэ арыый тиийбэт нэһилиэнньэлээх эбит. Владигы булуо этилэр эрээри, бириэмэни ылбахтыа эбит. Хата, эн үөрэппит оҕолоруҥ төрөппүттэрин кытта кэлин да сибээстэһэр буолан, боппуруоһу тута быһаарбыккын дии! Махтанабын!

– Антах тиийэн баран хаста да сибээстэһэ сылдьыбыта, кэпсэтэр этибит. Онон нүөмэрэ баара.

– Туох да мээнэҕэ буолбат. Дьоммут көрсүһүөхтэрэ диэн эрэнэбит.

Хаартысканы А. В. Малышева тиксэрдэ.