Доруобуйа күнүгэр 1,5 тыһыынча кэриҥэ киһи кытынна

Саха сиригэр Доруобуйа күнэ олохтоммута 25 сылыгар аналлаах Хаҥалас улууһугар ыытыллыбыт тэрээһининэн 1,5 тыһыынча кэриҥэ доруобуйа харыстабылын үлэһитэ, спортсменнар, былаас бэрэстэбиитэллэрэ кытыннылар.
«Биһиги Бастакы Бэрэсидьиэммит Михаил Ефимович Николаев бастакы ыйааҕа доруобуйа харыстабылын туһунан буолбута. Кини чөл олох доктринатын төрүттээбитэ, доруобуйа харыстабылын эбийиэктэрин туттарбыта, «Азия оҕолоро» диэн ханна да суох спорт күрэхтэһиитин олохтообута. Билигин Ил Дархан Айсен Николаев биллэрбит Доруобуйа харыстабылын 10 сыла бара турар. Бу форумунан биһиги, Михаил Ефимович этэн хаалларбытын курдук, норуот чөл туруктаах буоларын туһугар былаас, бизнес, уопсастыба бары биир ситимҥэ үлэлиэхтээхтэрин көрдөрөбүт», – диэн бэлиэтээтэ «Николаев-Центр» салайааччыта Юрий Семенов.

Ол курдук, форум чэрчитинэн нэһилиэнньэҕэ доруобуйа дьаарбаҥката, доруобуйа харыстабылын исписэлиистэригэр семинар, аҕам саастаахтарга «Открывая горизонты долголетия», эдэрдэргэ «Поколение ЗОЖ» аахсыйалар буолан аастылар. 
Оскуола үөрэнээччилэригэр күрэхтэһиилэр, лиэксийэлэр, интерактивнай дьарыктар, маастар-кылаастар ыытылыннылар. 
Норуоттар икки ардыларынааҕы кылаастаах спорт маастара, марафоҥҥа Арассыыйа биэс төгүллээх чемпиона, Олимпиада кыттыылааҕа Сардаана Трофимова маннык хабааннаах тэрээһиннэринэн төһө кыалларынан элбэх киһини хабарга баҕа санаатын этэн туран, улахан спорка суолун, ситиһии кистэлэҥнэрин сэгэттэ, маастар-кылаас ыытта.
СӨ физическэй култуураҕа уонна спорка үтүөлээх үлэһитэ Дмитрий Горохов йогаҕа, сүһүөххэ, тыынар уорганнарга эрчиллиилэринэн маастар-кылаас ыытта. 70 сааһыгар чугаһаабыт, ол иһигэр 20 сыл сүүрүүнэн утумнаахтык дьарыктанан кэлбит бэтэрээн спортсмен хамсаныы олоҕу уһатарын, доруобуйаны бөҕөргөтөрүн бэйэтинэн туоһулуур. «Аныгы үйэҕэ сүһүөх, сис ыарыыта элбээтэ, онон доруобуйаҕытын чэбдигирдиэххитин  баҕарар буоллаххытына элбэхтик хамсаныҥ уонна иҥэмтиэлээхтик аһааҥ», – диэн сүбэлээтэ.

Нэһилиэнньэҕэ сүҥкэн туһалаах тэрээһини көҕүлээччинэн уонна тэрийээччинэн СӨ доруобуйа харыстабылын,  спорт министиэристибэлэрэ, Хаҥалас улууһун дьаһалтата, СӨ уопсастыбаннай доруобуйатын уонна медицинскэй профилактика киинэ, физическэй култуураҕа уонна маассабай спорка управление, «Николаев-Центр» Бастакы Бэрэсидьиэн архыып-бибилэтиэкэтэ, Хаҥалас улууһун балыыһата, СӨ 3 №-дээх клиническай балыыһата буоллулар, диэн Ил Дархан уонна Бырабыыталыстыба пресс-сулууспата иһитиннэрэр.

Хаартыскалар: «Николаев-Центр».