Доруобуйа харыстабылын 15 бөдөҥ эбийиэгэ тутуллуоҕа

Тохсунньу 10 күнүгэр Ил Дархан Айсен Николаев доруобуйа харыстабылын боппуруостарыгар мунньахха чугастааҕы сылларга медицинэ инфраструктуратын сайыннарыыга «Уһун уонна көхтөөх олох», «Дьиэ кэргэн» уонна «Доруобуйаны харыстыыр аныгы технологиялар» диэн саҥа национальнай бырайыактар үлэлиэхтэрэ диэтэ. 

Ол курдук, 2028 сылга диэри тутуллуохтаах 15 саҥа бөдөҥ эбийиэктэн аҕыһа номнуо 2025 сылга үлэҕэ киириэҕэ: Амма сэлиэнньэтигэр поликлиника, Бүлүү уонна Ньурба куораттарыгар, Нам улууһун Намыгар уонна Үөһээ Бүлүү Андреевскайыгар сытар балыыһалар, Майаҕа балыыһа комплекса, Кэбээйи улууһугар Сангаарга поликлиникалаах комплекс, Аллараа Бэстээххэ учаастактааҕы балыыһа. 

2027 сылга Черскэйгэ уонна Белай Гораҕа поликлиника уонна стационар, Кэбээйи уонна Өлөөн улуустарын кииннэригэр стационардар үлэҕэ киириэхтэрэ.

2028 сылга Уус Алдан киинигэр Бороҕоҥҥо уонна Дьокуускай куоракка эмтэнэр корпус, 1 №-дээх поликлиника уонна Сунтаар бөһүөлэгэр балыыһа комплексын иккис уочарата үлэҕэ киириэхтэрэ. 

Нацбырайыактар чэрчилэринэн маны сэргэ 109 модульнай конструкция атыылаһыллан таҥыллыаҕа, 88 эбийиэккэ хапытаалынай өрөмүөн ыытыллыаҕа. 

Айсен Николаев бэлиэтээбитинэн, доруобуйа харыстабылын эбийиэктэрин материальнай-тэхиньиичэскэй баазаларын күүһүрдүү чэрчитинэн 239 массыына, 1014 медицинскэй оборудование атыылаһыллыаҕа. 
Ону сэргэ судаарыстыбаннай-чааһынай бииргэ үлэлээһин чэрчитинэн Дьокуускайга 2 №-дээх балыыһа тутуллар, займ дуогабарынан «Звездный» дьоҕус түөлбэҕэ — поликлиника.

Хоту улуустарга «Развитие Арктики» бырагырааманан алта нэһилиэккэ фельшер-акушер пууна үлэҕэ киириэҕэ. 

Дьокуускай уонна Нерюнгри куораттар маастар-былааннарынан Дьокуускайга 245 миэстэлээх өрөспүүбүлүкэтээҕи инфекционнай балыыһа уо.д.а. эбийиэктэр тутуллуохтара, Нерюнгрига киин балыыһа 14 эбийиэгэ саҥардыллыаҕа. 

Айсен Николаев анал байыаннай дьайыы кыттыылаахтарыгар медицинскэй реабилитацияны оҥоруу, каадыр, хамнас, эминэн хааччыллыы, наука ситиһиилэригэр тирэнии, цифровизация боппуруостарын эмиэ таарыйда. 

Санатар буоллахха, Өрөспүүбүлүкэ баһылыга Айсен Николаев ахсынньы 19 күнүгэр Ил Түмэҥҥэ Анал этиитигэр 2018 сылтан, ол иһигэр дойду баһылыга Владимир Путин көҕүлээбит «Доруобуйа харыстабыла» нацбырайыагынан, Саха сиригэр 106 доруобуйа харыстабылын эбийиэгэ, чуолаан Дьокуускай куоракка Кардиососудистай киин уонна Онкодиспансер тутуллубуттарын бэлиэтээбитэ, диэн иһитиннэрэр Ил Дархан уонна Бырабыыталыстыба пресс-сулууспата.

Хаартыска: Андрей Сорокин, СИА