«Дьол Аартыгын» тутуу саҕаланна

Санатар буоллахха, бу бырайыак быйыл «Олох инфраструктурата» нацбырайыак «Куорат сиригэр табыгастаах эйгэни тэрийии» бырагырааматын чэрчитинэн ыытыллыбыт куоластааһыҥҥа кыайыылаах тахсыбыта. «Дьол аартыгын» иһин куорат олохтоохторо 14 080 куолаһы биэрбиттэрэ.

Эбийиэк тас көстүүтүнэн хомус моһуоннаах оҥоһуллуохтаах. Бырайыак ааптара Дьокусукай куорат Бочуоттаах олохтооҕо, биллиилээх алгысчыт Афанасий Федоров бэлиэтээбитинэн, бу көннөрү архитектурнай форма буолбатах, дириҥ философскай суолталаах. Оттон манна ыраастана кэлбит киһи булгуччу этнокомплексы үстэ эргийиэхтээх.

Үөрүүлээх тэрээһиҥҥэ куорат баһылыга Евгений Григорьев кыттыыны ылан, куоластааһыны тэрийиигэ көхтөөхтүк үлэлээбиттэргэ Махтал суруктары туттарда – Александра Андросоваҕа, Василина Сон-Гига уонна Туяра Прокопьеваҕа.