Дьокуускайы көҕөрдүүгэ АГАТУ устудьуоннара көмөлөһүөхтэрэ

АГАТУ устудьуоннара үөрэхтэрин чиҥэтэллэригэр, практикаларын ааһалларыгар анаан ойуур сирин аныахтара. Ол туһунан киин куорат баһылыга Дмитрий Садовников уонна университет ректора Валерий Федоров сүбэлэстилэр. Ол курдук, “Якутский модельный лес” бырайыак чэрчитинэн научнай-производственнай былаһаакка үлэлиэҕэ. Бырайыак биһиги тыйыс усулуобуйабытыгар ойуур ресурсаларын сайыннарыыга, салайыыга тирэх буолуоҕа.

Маны тэҥэ Олохтоох дьаһалта уонна Агротехнологическай университет киин куораты көҕөрдүүгэ, Дьокуускай килиимэтигэр барсар үүнээйилэри талыыга, олордууга бииргэ үлэлэһэр былааннаахтар. Инниктин АГАТУ көмөтүнэн Дьокуускай сиригэр үйэлээхтик үүнэр, тымныыны тулуйар мастары, ыарҕалаахтары, сибэккилэри быһааран олордуохтара. Бу научнай хайысхалаах үлэҕэ АГАТУ устудьуоннара, преподавателлэрэ кыттыһыахтара.