Дьокуускайтан – Өлүөнэ очуостарыгар

Барыта 100-чэкэ оҕо төрөппүттэрин кытта «Михаил Светлов» теплоходунан Саха сирин кэрэ-бэлиэ сиригэр дуоһуйа сынньанан кэллэ.

Бэлиэтээн эттэххэ, круиз Дьокуускай куорат уокуруктааҕы дьаһалтатын өйөбүлүнэн, «Дьокуускай куорат уокуругун нэһилиэнньэтин социальнай өйөбүл уонна дьарыктаах буолуутугар көмө» муниципальнай бырагыраама үбүлээһининэн ыытылынна. Тэрээһини сүрүннээччинэн Олохтоох дьаһалта Уопсастыбаннай сибээскэ уонна ыччат бэлиитикэтигэр управлениета буолар.

Айан биир үтүө түгэнинэн алгыс сиэрэ-туома уонна доҕордоһуу оһуохайа буолбут. Ол кэнниттэн туристар икки бөлөххө арахсаннар, сорохтор үөһэ тахсыбыттар, атыттар теплоходка тэриллибит дьарыкка сылдьыбыттар.

Круиз кэмигэр сарсыардаттан киэһээҥҥэ диэри оҕолорго уонна төрөппүттэргэ аналлаах бииртэн биир сэргэх тэрээһиннэр ыытыллыбыттар. Ол курдук, бириистээх оонньуулар, ураты куонкурустар, мыыла хабахтарын шоута, аниматордар үҥкүүлэрэ тэриллибиттэр. Маны сэргэ, Дьокуускай куорат Дьиэ кэргэттэри өйүүр киинин педагога Д.Е. Суровова салалтатынан оҕолор күннээх палубаҕа олорон, айар үлэнэн дьарыктаммыттар. Бастыҥ үлэлээхтэргэ өйдөбүнньүк бириистэри уонна  бэлэхтэри туттарбыттар.

Круиз түмүктүүр түһүмэҕинэн «Эдэр талааннар» кэнсиэр буолбут. Онно оҕолор ыллаабыттар, үҥкүүлээбиттэр, хоһоон аахпыттар, хомуска оонньоон иһитиннэрбиттэр. Кэнсиэр кыттыылаахтара бары өйдөбүнньүк бириистэри уонна бэлэхтэри тутан, үөрүүлэрэ үрдээбит.

Бу оҕолорго умнуллубат айан буолла. Төрөппүттэр маннык сырыы туһалааҕын, итинник мустуу хайаан да наадатын бэлиэтээтилэр. Сибиэһэй салгын, кэрэ айылҕа, минньигэс ас, үлэһиттэр эйэҕэс сыһыаннара, Өлүөнэ туруук хайаларыгар тахсыы айанньыттарга чаҕылхай өйдөбүл буолан хаалыаҕа.