Дьокуускайтан кыһыҥҥы суол үс сиринэн арыллан турар
«Хатас – Павловскай» кыһыҥҥы суол сэтинньи 29 күнүттэн 30 туоннаҕа диэри көҥүллэммитэ, ахсынньы 29 күнүттэн 40 туоннаҕа диэри улаатта. «Дьокуускай – Аллараа Бэстээх» ахсынньы 25 күнүттэн 10 туоннаҕа диэри аһыллыбыта. Уонна бүгүҥҥүттэн, ахсынньы 29 күнүттэн, "Кангалаас – Суотту" хайысхаҕа 20 туоннаҕа диэри уйуктаах тиэхиньикэҕэ көҥүллэннэ.
Кыһыҥҥы кэмҥэ көҥүлэ суох сиринэн уу эбийиэктэринэн айан-сырыы иһин кытаанах эппиэтинэс күүтэр.
Чуолаан, СӨ Административнай быраабы кэһии туһунан кодексатын 9.10 ыстатыйатынан көҥүлэ суох сиринэн мууһунан тырааныспарынан сырыы-айан иһин:
- гражданнары 3 тыһыынча солкуобайтан 5 тыһ. солк. диэри ыстараап күүтэр;
- дуоһунастаах сирэйдэри – 20 тыһыынча солкуобайтан 50 тыһ. солк. диэри;
- юридическай сирэйдэри – 100 тыһыынча солкуобайтан 1 мөлүйүөҥҥэ диэри.
Бу дьаһаллар нэһилиэнньэҕэ сэрэхтээх буолууну хааччыйар, быһылаан тахсыытын сэрэтэр сыалтан ылыллаллар. Чуолаан Дьокуускай куорат Олохтоох дьаһалтатын быһаарыытынан 203-с түөлбэнэн, «Намыв» ыстаансыйанан, Күөх Хонуунан өрүскэ тахсар көҥүллэнэ илик.
Быраабыланы кэһээччилэри ГИБДД, ЫБММ уонна Дьокуускай куораттааҕы Гражданскай оборонаҕа уонна ыксаллаах быһыыга-майгыга управление үлэһиттэрэ кыттыылаах эриэйдэлэр бэрэбиэркэлииллэр.
Сонуннар
Ордук ааҕаллар
