Дьокуускайга «Ытык сир» этнопаарка аһылынна

Саҥа туона – куорат олохтоохторугар анаан сынньанар, сиэр-туом тэрээһиннэрин ыытар уонна саха норуотун ураты үгэстэрин харыстыыр аныгы култуурунай-аралдьытар сир. Бырайыак «Куорат сиригэр табыгастаах эйгэни тэрийии» федеральнай бырагыраамаҕа кыттыы түмүгэр олоххо киирдэ.

Тэрээһиҥҥэ куорат баһылыга Евгений Григорьев, СӨ култуураҕа уонна духуобунай сайдыыга миниистирин эбээһинэһин толорооччу Мария Турантаева, куорат баһылыгын солбуйааччы Владимир Аржаков, куорат култуураҕа уонна духуобунай сайдыыга управлениетын начаалынньыга Сардана Брызгалова, этнопаарка бырайыагын ааптара Афанасий Фёдоров уонна киин куорат олохтоохторо кытыннылар.

Тэрээһин чэрчитинэн алгыс сиэрэ-туома ыытылынна. Алгыһы СӨ үтүөлээх үлэһитэ, норуот артыыһа Афанасий Фёдоров толордо. Ыалдьыттар саламалары баайаннар, эйэлээх, нус-хас олоҕу баҕаран алҕаатылар.

Бырааһынньык сүрүн түгэнинэн оһуохай буолла, онно бары ыалдьыттар кытыннылар. Бэлиэтээн эттэххэ, «Ытык сир» этнопаарка куорат бары олохтоохторугар уонна ыалдьыттарыгар аһаҕас.