Дьокуускайга «Туймаада Ыһыаҕа-2026» бэлэмэ далааһыннаахтык ыытыллар

Хамыыһыйа үлэтигэр куорат баһылыгын солбуйааччылара, дьаһалта салааларын салайааччылара, ону тэҥэ тупсарыы, тырааныспар, үп-харчы уонна култуурунай бырагыраама өттүнэн эппиэттиир биэдэмистибэлэр бэрэстэбиитэллэрэ кытыннылар.

Ыам ыйын 22 күнүгэр «Үс Хатыҥ» комплекска ыытыллыбыт көһө сылдьар мунньах түмүгүнэн бырааһынньыгы тэрийии бары хайысхаларынан улахан хамсааһын барбыта бэлиэтэннэ. Ол курдук, бырааһынньык былаһааккатыгар киирэр муоста өрөмүөнэ түмүктэммит. Куттал суох буолуутун хааччыйыыга дьэллик сылгылар киирэллэрин бопсор күрүө туруоруллубут. Парковка зоната биллэрдик кэҥэтиллибит: Drivee массыыналарга эбии миэстэлэр (100 массыынаҕа анаан) тэриллибиттэр. Ону таһынан ааспыт нэдиэлэттэн суоллары грейдэрдээһин үлэтэ саҕаламмыт. Бырааһынньык күннэригэр Сэбиэскэй Аармыйа 50 сыла уулуссанан тырааныспар сырыыта арыллыаҕа.

Мунньахха бэлиэтээбиттэринэн, бэлэмнэнии сүрүн тэрээһиннэрэ болдьоҕор баран иһэллэр. Куораты уонна «Үс Хатыҥ» сиригэр киирэр суолу киэргэтии бэс ыйын 15 күнүттэн саҕаланыаҕа.

Тэрээһин мунньах түмүгүнэн куорат баһылыга Евгений Григорьев эппиэтинэстээх бары структураларга үлэ болдьоҕун тутуһарга уонна бэлэмнэниини тус хонтуруолларыгар ылалларыгар сорудахтаата. Ураты болҕомто бырааһынньык кыттыылаахтарын уонна ыалдьыттарын куттала суох буолууларыгар уонна тэрээһин ыытыллар сиригэр табыгастаах эйгэни тэрийиигэ уурулунна.