Дьокуускайга тутуллар Олоҥхо киинэ быйыл үлэҕэ киирэр
Өрөспүүбүлүкэтээҕи «Үтүө дьыала» бырайыак уонна «СӨ култуура эйгэтин сайыннарыы» судаарыстыбаннай бырагыраама иилэринэн Саха сиригэр быйыл өссө 5 култуура эбийиэгин үлэҕэ киллэрэр сорук турар.
Ол курдук, элбэх функциялаах култуура кииннэрэ Үөһээ Дьааҥы Суордаах, Кэбээйи оройуонун Батамай сэлиэнньэлэригэр, култуура-спорт комплекстара Мэҥэ Хаҥалас Бөкө, Үөһээ Бүлүү Быракаан бөһүөлэктэригэр үлэҕэ киириэхтэрэ. Оттон киин куоракка Олоҥхо уонна искусство Арктикатааҕы киинэ тутуллан бүтүөхтээх.
Даҕатан эттэххэ, федеральнай уонна өрөспүүбүлүкэ бүддьүөттэрин суотугар ааһан эрэр 2025 сылга номнуо Горнай улууһун Атамай нэһилиэгэр элбэх функциялаах сынньалаҥ киинэ уонна Мэҥэ Хаҥалас Аллараа Бэстээҕэр Василий Местников аатын сүгэр култуура киинэ үлэҕэ киирэн тураллар.
Дойду баһылыга Владимир Путин көҕүлээбит «Култуура» нацбырайыак иитинэн Сунтаар улууһун Кириэстээх сэлиэнньэтигэр 3,2 тыһ.кв.м. тахса иэннээх икки мэндиэмэннээх, 300 миэстэлээх көрөр саалалаах, 50 миэстэлээх киинэ көрөр саалалаах «Саргы түһүлгэтэ» социальнай-култуурунай киин үлэлии турар. Манна репетициялары ыытар, хореографиянан дьарыктанар анал хостору таһынан офистар, ааҕар саалалаах библиотека, кинигэ харайар сир, эрэстэрээн кытта бааллар.
Санатар буоллахха, 2018 сылтан аҥаардас Мэҥэ Хаҥалас оройуонугар Майаҕа Д.Ф. Ходулов аатынан элбэх функциялаах култуура-сынньалаҥ комплекса, Сыымахха култуура комплексыгар салҕааһын, Тиэлиги сэлиэнньэтигэр 100 миэстэлээх Култуура дьиэтэ тутулуннулар. 2018-2024 сылларга өрөспүүбүлүкэ үрдүнэн барыта 58 эбийиэк тутуллубута. Бэлиэтээн эттэххэ, 2025 сылтан «Култуура» нацбырайыак «Дьиэ кэргэн» нацбырайыак иһинэн үлэлиир, диэн Ил Дархан уонна Бырабыыталыстыба пресс-сулууспата иһитиннэрэр.
Хаартыска: Андрей Сорокин.
Сонуннар
Ордук ааҕаллар
