Дьокуускайга тоҕус эдэр ыал дьиэ усулуобуйатын тупсарыыга сертификаттары ылла

Бырагыраама киин куоракка 2009 сылтан үлэлиир. Бу кэм устата 725-тэн тахса ыал олорор дьиэлэрин усулуобуйатын тупсарар кыахтанна. Бүгүн өссө тоҕус эдэр ыал туоһу сурук тутта.

Дьокуускай куорат Дууматын бэрэссэдээтэлин бастакы солбуйааччыта Евдокия Евсикова дьиэ кэргэттэри сэртипикээттэри ылбыттарынан эҕэрдэлээтэ. Кини эдэр ыаллары өйөөһүн дойду социальнай бэлиитикэтигэр инники күөҥҥэ турарын бэлиэтээтэ.

“Биһиги дойдубутугар дьиэ кэргэни өйүүр элбэх бырагыраамалар бааллар, ол иһигэр Уһук Илиҥҥи ипотека уонна элбэх оҕолоох ыалларга сир учаастактарын түҥэтии. Бу бырагыраама эдэр ыаллар бастакы дьиэлэрин атыылаһалларыгар эбэтэр олорор усулуобуйаларын тупсаралларыгар көмөлөһөрө үөрдэр”, - диэн Евдокия Евсикова тоһоҕолоото.

Өйөбүл СӨ «Эдэр ыалы олорор дьиэнэн хааччыйыы» бырагырааманан «Хаачыстыбалаах дьиэнэн хааччыйыы» судаарыстыбаннай бырагырааманан оҥоһуллар. Манна хапсааччылар иккиэн 35-гэр диэри саастаах буолуохтаахтар. Социальнай төлөбүр дьиэ сыанатыттан 30-35% тэҥнэһэр. Үп-харчы кыбартыыра эбэтэр дьиэ атыылаһыытыгар, чааһынай дьиэ тутуутугар, ону тэҥэ бастакы усунуоһу угууга эбэтэр ипотека төлөбүрүгэр туттуллуон сөп.