Дьокуускайга Спорт дыбарыаһа уонна искусство оскуолалара тутуллуохтара

Киин куорат түөрт уокуругар оҕо искусствотын оскуолалара тутуллуохтаахтар: Хатаска, Октябрьскай уокурукка, Сайсарыга уонна Строительнайга. Маны таһынан Пригороднайга уонна Кангалааска култуура-сынньалаҥ кииннэрэ баар буолуохтара. Бу эбийиэктэр бары ыччат сайдарыгар, нэһилиэннньэ духуобунай сайдыытыгар төһүү буолуохтаахтар.

Мунньахха спортивнай инфраструктураны тэрийиигэ ураты болҕомто уурулунна. Пригороднайга спортивнай комплекс, Мархаҕа уонна Тулагы-Киллэмҥэ оҕо спортивнай оскуолалара тутуллуохтаахтар. Маны тэҥэ Бүлүү суолугар «Центр эстетических видов спорта» спорт дыбарыаһа, Автодорожнай уокурукка универсальнай спорткомплекс, Бестужев-Марлинскай уулуссатыгар элбэх хайысхалаах спорткомплекс тутуллаллара былааҥҥа баар.

Кэккэ эбийиэктэр бырайыактыыр-сметалыыр докумуоннара бэлэм, хантан үбүлэнэллэрэ чуолкайданан турар. Сорох эбийиэктэргэ докумуон үлэтэ саҥа саҕаламмыт. Тустаах салааларга федеральнай үбүлээһини кэмигэр ылар туһугар биир кэлим үлэни ыытарга сорудахтанна. Маны таһынан сир боппуруостара кэмигэр быһаарыллан иһэллэрэ тоҕоостоох.

«СӨ Бырабыыталыстыбатын уонна Дьокуускай куорат дьаһалтатын бииргэ үлэлэһиирэ сааһыланна. Маастар-былаан бырайыактара хайдах буолуохтаахтара чопчу биллэр, сүрүн сорукпут – тутуу үлэтэ кэмигэр ыытылларын хааччыйыахтаахпыт”, - диэн бэлиэтээтэ Сергей Местников.

2030 сылга диэри торумнаммыт Дьокуускай сайдыытын маастар-былааныгар 90 тэрээһин киирэн сылдьар. 2026 сылга киин куоракка 1 №-дээх оскуола, Музыка үрдүкү оскуолатын дьиэлэрэ уонна “Спортивнай” дьоҕус оройуон хаарбах дьиэлэриттэн дьону көһөрүүгэ территориялары бэлэмнээһин киирэр.