Дьокуускайга смарт-поликлиника арыллыаҕа

Быйыл сайын Куораттааҕы 2-с №-дээх балыыһа саҥа поликлиниката үлэҕэ киирэрэ күүтүллэр. Бу туһунан СӨ Баһылыгын уонна Бырабыыталыстыбатын пресс-сулууспата иһитиннэрэр.

Гагаринскай уокурукка симиэнэҕэ 600 киһи сылдьар кыахтаах, алта этээстээх поликлиника судаарыстыба уонна чааһынай партнёрство бириинсибинэн тутулла турар. Бырайыак инвесторынан уонна чааһынай партнёрунан «ВИС» бөлөх буолар. Өрөспүүбүлүкэ бырабыыталыстыбатын кытта сөбүлэҥ түһэрсэн, бырайыактыыр, тутар уонна саҥа поликлиниканы медицинскэй оборудованиенан, миэбэлинэн уонна инвентарынан хааччыйар эбээһинэстээх.

«Куорат соҕуруу өттүгэр иккис балыыһа өр сылларга олус кыараҕас усулуобуйаҕа үлэлии турар. Барыта былаанынан баран иһэр, тутааччылар ситэрэр, нарылыыр үлэҕэ киирбиттэр. Ыарахан ыйааһыннаах медицинскэй оборудование ылыллыбыт, сотору туруоруу саҕаланыаҕа. Бу сайын куоракка доруобуйа харыстабылын эйгэтигэр биир бастыҥ эбийиэккэ киириэхпит диэн эрэнэбит», – диэтэ Айсен Николаев.

«ВИС» бөлөх Территориальнай управлениетын бэрэстэбиитэлэ Андрей Суслов иһитиннэрбитинэн, билигин үлэ эбийиэк ис өттүгэр барар, былырыын сэтинньи ыйга итии киирбит. Итиинэн, уунан хааччыйар таһынааҕы ситим уонна тус ититэр пуун (ИТП) 100% бэлэм. Маны таһынан, алта массыына турар сылаас бокс уонна икки дьиэни холбуур эспланада бэлэм. Эбийиэккэ 90 оробуочай үлэлиир. Төһө да санкциянан кэккэ ыарахаттар баалларын иһин, медицинскэй хааччыллыы барыта ылыллыбыт – МРТ, КТ, УЗИ, рентген, эндоскопическай, маммографическай уонна ФЛГ оборудованиелар.

Инвестор тиэхиньикэ, инженернэй уонна медицинскэй оборудование эрэллээхтик үлэлиирин хааччыйыахтаах.  

Саҥа смарт-поликлиникаҕа оҕолор туспа аанынан киирэр буолуохтара, симиэнэҕэ 180 оҕо көрдөрүнэр кыахтаах. Оттон улахан дьоҥҥо аналлаах поликлиника кыамтата – симиэнэҕэ 300 киһи. 9 тыһыынча кв. миэтэрэ иэннээх сиргэ симиэнэҕэ 120 киһини көрөр дьахтар консультацията, күнүскү стационар, лаборатория, суһал көмө кэбиниэттэрэ, стоматология уонна колл-киин о.д.а. олохтонуохтара. 

Саҥа поликлиника Гагаринскай уокурукка хас да сиринэн арҕам-тарҕам турар 5 медицина эбийиэгин холбуоҕа, ыарыһахтарга да, үлэһиттэргэ да табыгастаах усулуобуйа тэриллиэҕэ. 

Хаартыскалар: Андрей Сорокин, СИА