Дьокуускайга — Сайылык күнэ

Ааспыт субуотаҕа киин куорат олохтоохторо уонна ыалдьыттара Сайылык күнүн киэҥ далааһыннаахтык бэлиэтээтилэр. Бу күн Орджоникидзе болуоссата алгыстаах алаадьы сытынан туолла, түптэ унаар буруотунан тунуйда.

Куорат килбэйэр киинигэр, тэбэр сүрэҕэр ыытыллыбыт үтүө тэрээһиҥҥэ үс тыһыынчаттан тахса киһи кытынна диэн бэлиэтииллэр. Сайыны көрсүү, күөххэ үктэнии сиэрэ-туома куорат олохтоохторугар суолтата оннук үрдүк буоллаҕа.

Алгыс баһа сыаланна, «Уруй-туску!» этилиннэ. Үөрүүлээх арыллыы биир бэлиэ түгэнинэн кэлбит дьону, ыалдьыттары алгыстаах алаадьынан күндүлээһин буолла. 

Куорат Дууматын бэрэссэдээтэлин бастакы солбуйааччы Евдокия Евсикова уонна куорат баһылыгын солбуйааччы Владислав Слепцов олохтоохтору, ытык-мааны ыалдьыттары күөххэ үктэммиппитинэн, самаан сайыммыт саҕаламмытынан эҕэрдэлээтилэр. Тыа хаһаайыстыбатын туруу үлэһиттэрин чиэстээтилэр.   Ол курдук, чааһынай урбаанньыт, уопсастыбанньык Николай Захаров, «Баҕарах» ХЭТ үлэһиттэрэ Екатерина Слепцова, Полина Грязнухина, кэтэх хаһаайыстыба баһылыга Владимир Соболев (Хатас нэһилиэгэ), бааһынай хаһаайыстыба үлэһитэ Павел Васильев, Тулагы Киллэм нэһилиэгиттэн кэтэх хаһаайыстыба баһылыга Валерий Сивцев бочуотунай грамоталары, махтал суруктары туттулар.

Бу күн киин куорат сүрүн болуоссатыгар сайылыгы, самаан сайыны санатар сахалыы ылбаҕай ырыа-тойук ыраахха диэри дьиэрэйдэ. Дьокуускай куорат самодеятельнай кэлэктииптэрэ, саха эстрадатын артыыстара көрөөччү биһирэбилин ыллылар. «Сайылык ыччата» бырагыраама тэрээһини ордук киэргэттэ. «Кыталык», «Өркөн», «Ситим» уо.д.а. ансаамбыллар нарын-намчы кыргыттара кыталыктыы кынталдьыйдылар, уолан уолаттара чохчоохойдоон ойдулар. Саха төрүт үгэһин тарҕатар эдэркээн оҕолор дьиэрэҥкэйдээн өрө көттүлэр, күҥҥэ тиийэ күөрэйдилэр, ыйга диэри ыстаннылар. М.К. Аммосов аатынан ХИФУ «Сэргэлээх сулустара» устуудьуйатын (сал. СӨ норуодунай артыыстара Алексей, Екатерина Егоровтар) иитиллээччилэрэ, чахчы даҕаны, сыанаҕа сулустуу тырымнаатылар.

Норуот күрэхтэрэ бэрт көхтөөхтүк аастылар: кыттааччылар кус үргээн, күөрчэх ытыйан күрэхтэстилэр. Кыайыылаахтар, иккис, үһүс миэстэлээхтэр сыаналаах сертификаттарынан наҕараадаланнылар, эбиитин үргээбит кустарын дьиэлэригэр кыбынан илдьэ бардылар, кус амсайар дьолго тигистилэр!    

«Саха мааны аһа-таҥаһа» түһүлгэҕэ олохтоох оҥорон таһаарааччылар бородууксуйаларын тардан кэбистилэр. Ас-үөл  дэлэй, күн талбыта барыта баар: көмүс хатырыктаахтаан саҕалаан, үтэһэлээх эккэ тиийэ. Куорат олохтоохторо ахтылҕаннаах алаас аһын хото атыылаһан, дьиэлэригэр илии тутуурдаах бардылар.  Маны таһынан төрүт ас арааһын – кус, ис миинин, саламааты, күөрчэҕи астына амсайдылар, кымыс, быырпах иһэн, сүрэхтэрин сөрүүкэттилэр. Таҥас-сап, иһит-хомуос, киэргэл, симэх, норуот маастардарын уран оҥоһуктара атыыга хамаҕатык барда. Ыһыахха кэтэр халадаайдарын, хаһыаччыктарын, киэргэллэрин-симэхтэрин мантан булуннулар, этэргэ дылы, бастарыттан атахтарыгар диэри туруору таҥнан, сүргэлэрэ көтөҕүллэн тарҕастылар.     

«Саха төрүт оонньуулара» түһүлгэҕэ оонньуу, көр-нар көҕүлүттэн тутулунна. Кыралыын-кырдьаҕастыын, эдэрдиин-эмэнниин хабылыктаан, хаамыскалаан, маастар-кылаастарга кыттан, «Хомуур күрэххэ» холонон, сэргэхсийэн, аралдьыйан, сынньалаҥнарын бэркэ атаардылар. Оттон «Саха балаҕана» хаартыска зонатыгар уһун уочарат буолла.

Маны сэргэ, Кырдьаҕас куоракка талба талааннаах норуот маастардарын үлэлэрин быыстапка-дьаарбаҥката ыытылынна.

Тэрээһин норуоту сомоҕолуур оһуокайынан түмүктэннэ. Үөрүүбүт-көтүүбүт үксээтэ, өрөгөйбүт үрдээтэ. Сайылык күнэ киин куоракка ыытыллара үтүө үгэскэ кубулуйдун!  

Саха сиригэр Сайылык күнэ 2018 сыллаахха сэтинньи 6 күнүгэр Ил Дархан Айсен Николаев ыйааҕынан олохтоммута, сыл аайы ыам ыйын 22 күнүгэр бэлиэтэнэр. 

Хаартыскалар: Ааптар түһэриилэрэ