Дьокуускайга саха сылгытын киинин арыйыы туһунан сүбэлэстилэр

Дьокуускайга саха сылгытын киинин арыйыы боппуруостарын ырытыһар киэҥ ис хоһоонноох сүбэ-мунньах буолла.
"Мунньахха СӨ тыа хаһаайыстыбатын миниистирэ Артем Александров, саха сылгытын ааттатааччы, тарҕатааччы, айанньыт Дугуйдаан Винокуров, өрөспүүбүлүкэтээҕи ат спордун федерациятын толорооччу дириэктэрэ Поликарп Барахсанов, саха сылгытын иитэр бааһынай хаһаайыстыбалаах Петр Неустроев, ЯРО ВООПИК салайааччыта Руслан Васильев уонна уокуруктааҕы дьаһалта структурнай уонна территориальнай салаалара кытыннылар", – диэн Дьокуускай куорат баһылыга Евгений Григорьев иһитиннэрдэ.
Мунньах кыттыылаахтара бары биир санааҕа кэлэн, саха төрүт дьарыгын, култууратын биир сүрүнэ буолбут саха сылгытын киэҥник тарҕатарга, биллэрэргэ Дьокуускайга анал киин аһыллыахтаах  диэн санааҕа түмүстүлэр.
Киин туллар тутааҕынан, эргийэр киининэн сылгы туризмынан дьарыктанар урбаан буолуон сөп: дьарыктанарга сөптөөх, ылсарга бэлэм урбаанньыттар бааллара үөрдэр.
Руслан Васильевич киини олохтуур барыллаан сиргэ ураты историческай суолталаах миэстэлэр аҕыйаҕа суохтарын, Эллэй өбүгэни кытта ситимнээх памятниктар, айылҕа кэрэ көстүүлээх сирдэрэ үгүстэрин бэлиэтээтэ.
Маны сэргэ биир эмиэ кэрэхсэтэр хайысханан сылгы иитэр фермалаах, сувенир бородууксуйатын атыылыыр, иппотерапиялаах, аты миинэргэ үөрэтэр оскуолалаах агротуризм буолуон сөбө этилиннэ. Бу хайысханы Дугуйдаан Винокуров хаһыс да сылын көҕүлүүр идиэйэтэ – саха сылгытын түмэлэ – ситэрэн-хоторон биэриэн сөп.

Мунньахха биир кэскиллээх этии: Үс Хатыҥ ипподромун ыксатыгар сүүрүк аттар көньүүһүнэлэрин тутуу туһунан этилиннэ. Бу ипподрому саҥалыы тыынныан, аты сүүрдүүнү Туймаада Ыһыаҕыттан атын да кэмҥэ ыытары көҕүлүөн сөп.
"Сүбэ-мунньах кыттыылаахтарын кытта бу интэриэһинэй уонна туһалаах бырайыагы сыныйан үөрэтэргэ үлэлиир бөлөҕү тэрийэргэ дуогабардастыбыт", – диэн Евгений Григорьевич телеграм-каналыгар суруйда.