Дьокуускайга саҥа хочуолунай үлэҕэ киирдэ

Дьокуускайга Адаптивнай үөрэх комплексын хочуолунайа – «Теплоэнергия» АУо «Южнай» филиала – үлэҕэ киирдэ. Үөрүүлээх тэрээһиҥҥэ куорат баһылыга Евгений Григорьев, «Теплоэнергия» АУо гендириэктэрэ Михаил Воробьев уонна «Гларимак» ПТК ХЭТ гендириэктэрэ Георгий Главанарь кыттыыны ыллылар.

Саҥа эбийиэк бэлиэ күлүүһүн тутан арыйар чиэһи ылбыт куорат баһылыга Евгений Григорьев «Теплоэнергия» үлэһиттэрин Олох-дьаһах хомунаалынай хаһаайыстыбатын үлэһиттэрин идэлээх бырааһынньыктарынан эҕэрдэлээтэ уонна саҥа хочуолунай доруобуйаларынан хааччахтаах оҕолорго аналлаах Үөрэх адаптивнай комплекса курдук ураты кыһаны хааччыйар аналлааҕын бэлиэтээтэ.

«Теплоэнергия» АУо гендириэктэрэ Михаил Воробьев саҥа эбийиэги кылгас болдьоххо киллэрбит кэлэктиип үлэһиттэригэр уонна бэдэрээттээх тэрилтэҕэ махталы биллэрдэ уонна сотору кэминэн Мархаҕа оскуола-интэринээккэ уонна Птицефабрика оройуонугар саҥа хочуолунайдар үлэҕэ киирээри туралларын санатта.

Бэлиэтээн эттэххэ, 10 МВт кыамталаах саҥа хочуолунайы тутуу 2024 сыл ыам ыйын 10 күнүттэн саҕаламмыта. Бу технологическай холбонуу төлөбүрүн суотугар тутуллубут бастакы хочуолунай буолар. Хочуолунай олорор дьиэлэри, промышленнай, кэмиэрсийэлээх даҕаны эбийиэктэри итии-тымныы уунан хааччыйан саҕалаата. Хочуолунай тус-туспа блоктартан турар буолан, блоктара туһунан да туттуллуохтарын, ирдэнэр кыамтаны ситиһэр туһуттан хастыы да буолан холбонуохтарын сөп. Маннык технология эбиитин саахалтан харыстыыр аналлаах, диэн Олохтоох дьаһалта пресс-сулууспата иһитиннэрэр.