Дьокуускайга саҥа 50 VolgaBus оптуобус кэлиэ
Ааспыт нэдиэлэ бүтүүтэ Дьокуускай куорат баһылыга Евгений Григорьев сорудаҕынан, баһылыгы солбуйааччы Владимир Дорожкин Москва куоракка VolgaBus 5270GH мааркалаах 50 аныгы кэм оптуобуһун ылар сөбүлэҥи түһэрсиигэ кытынна.
Бу саҥа оптуобустар, олорор 27 миэстэни ааҕан туран, 65 пассажиры тиэйэргэ суоттаммыттар. Ону тэҥэ кэлиэхтээх оптуобустары хоту сир усулуобуйатыгар сөп түбэһиннэрэн икки хос өстүөкүлэлиэхтэрэ, эбии салоны ититэр тэриллэринэн хааччыйыахтара. Оттуктара – билиҥҥи экология ирдэбилигэр эппиэттиир ыгыллыбыт айылҕа гааһа (КПГ). Бу саҥа оптуобустар бары куорат маршруттарыгар үлэлиэхтэрэ.
Санатар буоллахха, 2022 сылтан 2024 сылга диэри өрөспүүбүлүкэ киин куоратыгар уонна улуустарыгар уопсайа 124 оптуобус аҕалыллан хоту сир усулуобуйатыгар тургутууну этэҥҥэ туораан, сүүрэр, үлэлиир кыахтаахтарын көрдөрбүттэрэ.
Уопсастыбаннай тырааныспары саҥардыы «Саха Өрөспүүбүлүкэтигэр тырааныспар комплексын сайыннарыы» судаарыстыбаннай тосхолунан уонна куорат инфраструктуратын сайыннарыы стратегиялаах соруктарын толоруу чэрчитинэн ыытыллар.
Сонуннар
Ордук ааҕаллар
