Дьокуускайга үс дьиэ хапытаалынай өрөмүөнүн бэрэбиэркэлээтилэр

“Саха сиринээҕи элбэх кыбартыыралаах дьиэлэр  хапытаалынай өрөмүөннэрин пуондата” коммерческайа суох тэрилтэ, региональнай оператор быһыытынан үлэлиир. Пуонда үлэтин сүрүн сыала-соруга – дьон олорор усулуобуйатын тупсарыы, энергетика өттүнэн эргиччи көдьүүстээх ресурсалары харыстыыр технологиялары олоххо киллэрии, элбэх кыбартыыралааах дьиэлэри өрөмүөннээһин.

Пуонда үбэ элбэх кыбартыыралаах дьиэлэр олохтоохторо, учредителлэр, дьиэни-уоту бас билээччилэр киллэрэр усунуостарыттан оҥоһулларын бука бары бэркэ билэбит.

Киров уул. 27/1 №-гэр турар 69 кыбартыыралаах дьиэни  “Тэсмострой” ХЭТ бэдэрээттээх тэрилтэ өрөмүөннээн эрэр.  Уопсайа 10 802 163 солк. сыаналаах өрөмүөн үлэтин оҥорор. Үлэ 60 % оҥоһуллубут. Дьиэни “Квартал 103 Услуги”  салайар хампаанньа көрөр-истэр. Сэттэ үлэһиттээх биир биригээдэ үлэлии сылдьар. Биир кыбартыыра хаһаайыттара кэлэ иликтэриттэн сылтаан графиктан кыра хаалыы баара бэлиэтэннэ. Октябрьскай уокурук управата өрөмүөн үлэтэ барарыгар туох кыахтаҕынан көмөлөһөр. Бэдэрээтчит дьиэ ититиитин систиэмэтин өрөмүөнүн кыстыкка киириигэ барытын силигин ситэриэхтээх.

24 кыбартыыралаах П.Алексеев уул. 6 №-дээх дьиэтигэр хапытаалынай өрөмүөнү “Алекс-Ком” ХЭТ ыыта сылдьар. Уопсайа 5 354 765 солк. суумалаах өрөмүөн оҥоһуллар. Дьиэни "Квартал 51 Услуги” салайар хампааньа көрөр-истэр. Бу дьиэ бастакы этээһигэр баар маҕаһыыннарга турбаларын көтүрэллэр, магистральнай ситим тардыллан эрэр, кыбартыыраларга үлэ саҕалана илик. Манна хапытаалынай өрөмүөнтэн аккаастаммыт 3 кыбартыыра баара үлэ хаамыытыгар кэккэ харгыстары үөскэтэрэ тоһоҕолоон бэлиэтэннэ. Үлэ 20 % оҥоһуллубут.

Лермонтов уул. 26 №-дээх дьиэтигэр 9 497 798, 2 солк. суумалаах өрөмүөн үлэтэ барыахтаах. “Стройинвест” ХЭТ биригээдэтэ кыбартыыраларга ыытыллыахтаах үлэни бүтэрбит, техэтээскэ магистральнай ситимнэргэ үлэ барар, дьиэ иһинэн-таһынан турбалар кыстанан сыталлар. Үлэ 70 % бэлэм.  

***

Хапытаалынай өрөмүөн пуондатын сүрүн инженерэ Федор Лукин бэлиэтээбитинэн, хапытаалынай өрөмүөн – хас да түһүмэхтэн турар уустук үлэ – манна бэдэрээттээх тэрилтэлэр, салайар хампаанньалар, ТСЖ-лар, дьиэни бас билээччилэр бары биир ситимнээх үлэни ыыталлара көдьүүстээх буолар. Бары уопсай тылы булан, үлэни сааһылаан торумнаатахтарына эрэ үлэ хаачыстыбата ирдэбиллэргэ эппиэттиир уонна кэмигэр түмүктэнэр.