Дьокуускайга – мүөт дьаарбаҥката!

Киин куорат олохтоохторо уонна ыалдьыттара «Московскай» атыы-эргиэн киинин утары  искибиэргэ дойду иһигэр оҥоһуллубут бородууксуйаны атыылаһар кыахтаныахтара.

Дьаарбаҥкаҕа Саха сириттэн, Башкортостантан, Алтай хайаларыттан, Приморьеттан уонна Абхазияттан мүөтү таһынан от чэйдэрэ, бальзамнар уонна тымныы ньыманан ылыллыбыт арыылар көрдөрүллүөхтэрэ. Минньигэһи сөбүлүүр дьону бэс эриэхэтиттэн уонна роза сибэкки эминньэхтэриттэн оҥоһуллар 40-тан тахса араас барыанньа, ону тэҥэ рахат-лукум, чурчхела уонна халва күүтэр. Тус-туспа быыстапкаҕа саҥа хомуллубут 70-тан тахса араас эриэхэлэр уонна сухофрукталар баар буолуохтара.

Аһыллыыта от ыйын 1 күнүгэр күнүс 12:00 чаастан буолуоҕа. Бу  күн артыыстар кэнсиэрдэрэ, күрэхтэһиилэр уонна өйдөбүнньүк бэлэхтэри таһынан, култуурунай бырагыраама былааннанар. Дьаарбаҥка икки ый устата күн ахсын үлэлиэҕэ. Киирии босхо.