Дьокуускайга – кырыа кыһын бырааһынньыга

Маны сэргэ бу күн муус, хаар оҥоһуктарыгар норуоттар икки ардыларынааҕы «Саха сирин бирилийээннэрэ» күөн күрэс, «Саха сирин амтана» гастрономическай куонкурус түмүгүн үөрүүлээхтик таһаардылар.

Киэҥ уораҕай тулаһатын толору көрөөччүлээх дьоро түгэн «Путешествие за вкусом» арктическай куукуна быыстапкатыттан саҕаланна. Маны сэргэ «Зимние фантазии» олохтоох оҥорон таһаарааччылар сувенирдарын быыстапка-дьаарбаҥкалара, «Зимаfest» дьиэ кэргэн интерактивнай туоната дьон-сэргэ болҕомтотун тартылар. Оттон Дьокуускайдааҕы «Ирбэт тоҥ саарыстыбатын кистэлэҥэ» тэрилтэ Оҕо искусство оскуолата кыттыылаах ырыалаах-үҥкүүлээх туруоруута, ол кэннэ «Саха сирин бирилийээннэрэ» оҕо тыйаатырын образцовай кэлэктиибин «Олоҥхо дойдутун Саҥа дьыллааҕы остуоруйата» ырыа-үҥкүү испэктээгэ мустубут дьону остуоруйа алыптаах туругар киллэрдилэр.

Үгэс курдук ахсынньы 1 күнүгэр Саха сирин араас муннугар Саҥа дьыллааҕы күөх харыйа уотун уматан, кыһын Саха сириттэн саҕаланарын бэлиэтииллэр.

Ол сиэринэн бэнидиэнньик күн өрөспүүбүлүкэ уонна куорат сүрүн харыйаларын үөрүүлээх быһыыга-майгыга ырыа-тойук аргыстаах уматтылар.

Дьокуускай куорат сүрүн Саҥа дьыллааҕы харыйатын уотун уматар дьоро тэрээһиҥҥэ Орджоникидзе болуоссатыгар тыһыынчанан киһи тоҕуоруста, ырыа-тойук дуорайда. Бырааһынньыктааҕы тэрээһин көрдөөх оонньуулартан саҕаланна. Ол кэннэ күн күүтүүлээх түгэнин дьоруойдара – Чысхаан, Зимушка, Моруос оҕонньор Хаарчаанатыныын уонна кэлэр сыл бэлиэтэ Сылгы – дьон иннигэр таҕыстылар. Чысхаан торуоскатын Моруос оҕонньорго уунаатын кытта, ап-хомуһун дьайбытыныы, куорат сүрүн харыйата сандаара умайда.

Бу кэннэ Ленин проспегынан араас тыгыалас уотунан, дьэрэкээн оонньуурунан симэммит-киэргэммит куораттааҕы тэрилтэлэр массыыналарын бырааһынньыктааҕы автоколонналара айаннаата. Тымныы оҕуһа уонна хотугу таба кыһын бэлиэтэ буоланнар массыыналары киэргэттилэр.

Ити курдук, симэммит харыйа дьэрэкээн уота сандаара умайан, дьоҥҥо-сэргэҕэ Саҥа дьыл тыынын сахта, кырыа кыһын биир кэрэ түгэнин бэлэхтээтэ.