Дьокуускайга Кыайыы 80 сылын уруйдаатылар

Ааспыт нэдиэлэҕэ Дьокуускайга Аҕа дойду Улуу сэриитигэр Кыайыы үбүлүөйдээх 80 сылын бэлиэтиир бырааһынньыктааҕы тэрээһиннэр киэҥ далааһыннаахтык ыытылыннылар.\

Кыайыы иһин олохторун толук уурбут үтүө дьоммут ааттарын үйэтитэр соруктаах сыллата ыытыллар «Өйдөбүнньүк чүмэчитэ» аахсыйаҕа быйыл 15 тыһ. тахса киһи кытынна.

Ыам ыйын 8 күнүгэр «Кыайыы проспега» диэн улахан бырайыак бастакытын ыытылынна. Орджоникидзе болуоссатыттан Доҕордоһуу болуоссатыгар диэри сүрүн уулусса былаһын тухары араас култуурунай-маассабай, байыаннай-историческай, патриоттуу тыыннаах аахсыйалар, тэрээһиннэр буоллулар. Бу күн оҕотуттан эмэн саастааҕар диэри 11 тыһыынча кэриҥэ киһи Ленин проспегын үҥкүү туонатыгар кубулутан, «Кыайыы вальсыгар» эргийдилэр. Дойду үрдүнэн ыытыллыбыт аахсыйаҕа саамай элбэх кыттааччылаах вальс рекорда олохтонно.

Улуу Кыайыы күнүгэр – ыам ыйын 9 күнүгэр – бырааһынньык сүрүн тэрээһиннэрэ Кыайыы болуоссатыгар «Кыайыыны аҕалбыт буойуннар» монумеҥҥа сибэкки дьөрбөтүн ууруу сиэриттэн-туомуттан саҕаланна. Мустубут дьон чуумпуран, иһийэн туран сэрии сылларыгар фроҥҥа уонна тыылга олохторун толук уурбут дьоммут сырдык ааттарын кэриэстээтилэр. Тэрээһин бочуоттаах ыалдьыттарынан Аҕа дойду Улуу сэриитин кыттыылаахтара Мартын Герасимович Григорьев, Кирилл Егорович Павлов, Наум Трифонович Слепцов, Петр Константинович Яковлев уонна үлэ, тыыл бэтэрээннэрэ буоллулар. Ону тэҥэ Кыайыы күнүн бырааһынньыктааҕы тэрээһинигэр анал байыаннай дьайыы кыттыылаахтара кытыннылар. Салгыы байыаннай-патриотическай парад үрдүк таһымнаахтык ыытылынна.

Кыайыы күнүн уруйдуур парад кэннэ быйыл өр кэм буолан баран сирэй ыытыллыбыт «Өлбөт үйэлээх полк» киэҥ хабааннаах аахсыйаҕа 50-тан тахса тыһыынча киһи Кыайыыны уһансыбыт аймах дьоннорун мэтириэттэрин тутан сэлэлии хаамтылар. Бу аахсыйаҕа СӨ Ил Дархана Айсен Николаев, Дьокуускай баһылыга Евгений Григорьев мустубут дьону кытта тэҥҥэ хааман, Аҕа дойду Улуу сэриитин кыттыылаахтарын кэриэстээтилэр.

Эбиэттэн киэһэ болуоссакка Кыайыы оһуокайа дьиэрэйдэ. Үбүлүөйдээх Кыайыыны уруйдуур оһуокайга 5 тыһ. тахса киһи кытынна.

Бу күн Кыайыы болуоссатыгар «Дьокуускай – килбиэннээх үлэ куората» биир дойдулаахтарбыт үлэҕэ килбиэннэрин, хорсун көрдөрүүлэрин сырдтатар Дьокуускай тэрилтэлэрин киэҥ быыстапкатын кэлбит дьон сэргии, киэн тутта көрдө.

Киэһэ бырааһынньык-тааҕы кэнсиэр кэннэ Кыайыы күнүн муҥутуур чыпчаала – Кыайыы болуоссатыгар салют ньиргийдэ. Үбүлүөйдээх тэрээһини түмүктүүр Кыайыы салюта 15 мүнүүтэ тохтоло суох хараҥа халлааны сырдатан, араас уотунан чаҕылыйда.