Дьокуускайга Кыайыы 80 сылыгар бэлэмнэнии тула мунньах буолла

Дьокуускай баһылыга Евгений Григорьев Кыайыы 80 сылын көрсүһүүгэ бэлэмнэнии уонна бырааһынньыгы ыытыы туһунан тэрийэр кэмитиэти кытта мунньахтаата.
Мунньахха куорат уокуруктааҕы дьаһалтатын подразделениеларын салайааччылара ыытыллыбыт үлэни уонна былааннары кэпсээтилэр.
Улахан болҕомтону куорат тупсаҕай көстүүтүгэр уурдулар. Куорат баһылыгын хаһаайыстыбаннай боппуруостарга солбуйааччы Владислав Слепцов ыытыллыахтаах үлэлэр тустарынан сиһилии сырдатта. Кини иһитиннэрбитинэн, пааматынньыктары өрөмүөннээһин, сквердэри, пааркалары тупсарыы курдук киэҥ хабааннаах тэрээһиннэри киллэрэн туран, барыта 44 үлэ ыытыллыахтаах.
Билигин Орджоникдзе уулуссатыгар баар Николай Кондаков, тыыл үлэһиттэрин уонна сэрии тулаайахтарын, ону тэҥэ "Туймаада саллаата" мемориальнай сквердэргэ үлэ саҕаламмыт. Оттон Саҥа Табаҕа Комсомольскай уулуссатыгар баар Кыайыы пааматынньыгын тупсаҕай оҥоруу үлэтэ ситиһиилээхтик түмүктэммит. Владислав Слепцов мунньахха куорат уокуруктарыгар уонна куорат кытыытынааҕы бөһүөлэктэргэ баар пааматынньыктары, сквердэри өрөмүөннээһин, тупсарыы үлэтэ ыытыллар болдьохторун сиһилии билиһиннэрдэ. Маны таһынан Аҕа дойду сэриитин кыттыылаахтарын ааттарын сүгэр уулуссаларга ыытыллыахтаах үлэлэргэ бэдэрээтчити быһаарар куонкурус түмүктэммитин иһитиннэрдэ. Доҕордоһуу уонна Кыайыы болуоссаттарыгар электричество уотун киллэрэр үлэ хаамыытын кэпсээтэ. Манна бэдэрээтчиттэри кытта дуогабардарга илии баттанан, ыытыллыахтаах үлэ болдьоҕо, суумата быһаарыллыбыт. 
Мунньахха куорат баһылыгын Дьокуускай уокуругун сайыннарыы боппуруостарыгар, тырааныспар өҥөтүгэр уонна тырааныспарынан хааччыйыыны тэрийиигэ солбуйааччы Антон Алексеенко Кыайыы болуоссатыгар ыытыллар өрөмүөнү, Кыайыы пааркатыгар, Маҕанныыр суолга баар анал байыаннай дьайыы кыттыылаахтарыгар аналлаах буойуннар мемориальнай комплекстарыгар барар тутуу үлэлэрин, ону тэҥэ Гериатрическай киин таһыгар тутуллуохтаах сылаас тохтобул туһунан сырдатта.
"Кыайыы пааркатыгар" парковканы бэлэмнээһин, сырдатыытын таҥыы уонна сценаны туруоруу үлэтэ былааннанарын, билигин бу үлэҕэ туһаныллар матырыйааллар тириэрдиллэн туралларын кэпсээтэ. 
Маны таһынан Антон Алексеенко ССРС уонна РФ Дьоруойдарын сырдатар табличкалары, аадырыһы ыйар аншлагтары оҥоруу үлэтэ хайдах бара турарын сырдатта.
Дьокуускай куорат баһылыга Евгений Григорьев мунньах кыттыылаахтарын дакылааттарын истэн баран, Кыайыы 80 сылыгар бэлэмнэнии былаана ситиһиилээхтик олоххо киирэригэр туох баар күүһү уурарга сорудахтаата.