Дьокуускайга – «Кыһын Саха сириттэн саҕаланар-2025»

Сэтинньи 23 күнүгэр «Саха сирин амтана» гастрономическай, «Саха сирин бирилийээннэрэ» муус-хаар оҥоһуктар бэстибээллэрин уонна «Тоҥ балык-2025» куонкурус кыттыылаахтара биир сыанаҕа мустуохтара. Бэстибээл бырагыраамата манна.

Бэстибээл аһыллыыта – сэтинньи 23 күнэ

Бу уонна быйылгы бэстибээлгэ туох саҥа, сонун былааннанарын туһунан Дьокуускай уокуруктааҕы дьаһалтатын култуураҕа уонна духуобунай сайдыыга управлениетын салайааччыта Сардана Брызгалова «Россия24» телеканал «Куораты кытта быһа эпиир» сэтинньи 13 күнүнээҕи быһа биэриитигэр кэпсээтэ.

«Бэстибээл сэтинньи 23 күнүгэр, бу өрөбүлгэ аһыллыа. Быйыл тэрийээччилэр бэстибээл бары кыттыылаахтара көрсөллөрүн уонна бэйэлэрин көрдөрөллөрүн курдук, биир холбоһуктаах былаһаакканы оҥорорго быһаарбыттара. Быйыл Саха академическай тыйаатырга сэтинньи 23 күнүгэр бэстибээл үс сүрүн куонкуруһун бары кыттыылаахтара мустуохтара: «Саха сирин амтана» – гастрономическай бэстибээл, «Саха сирин бирилийээннэрэ» – муус уонна хаар оҥоһуктар уонна саамай күүтүүлээх күрэх – «Тоҥ балык-2025», – диэн сырдатта Сардана Брызгалова.

«Саха сирин бирилийээннэрэ»

Хаһыс да сылын ыытыллар, көрөөччү көҕүн уһугуннарар, уран уустары түмэр «Саха сирин бирилийээннэрэ» норуоттар икки ардыларынааҕы таһымнаах муус оҥоһуктар куонкурустара сэтинньи 24 күнүгэр Орджоникидзе болуоссатыгар блиц-турниртан саҕаланыа. Быйыл Саха сирин улуустарыттан, Татарстантан, Санкт-Петербуртан, Бурятияттан, Кытайтан, Монголияттан уо.д.а. дойдулартан тымныыттан чаҕыйбат, мууһу-хаары лыҥкынатар уран уустар кыттыахтара. Блиц-турнир тиэмэтэ – «Хоту сир норуоттарын остуоруйалара». Бу күн баҕалаах дьоҥҥо муустан скульптураны оҥорууга маастар-кылаас ыытыллыа. Оттон «Саха сирин бирилийээннэрэ» бэстибээл сүрүн куонкуруһа – муус уонна хаар оҥоһуктар күрэхтэрэ – үгэс быһыытынан 202-с түөлбэҕэ «Северное сияние» муус пааркатыгар буолуо.

«Саха сирин бирилийээннэрэ» куонкуруска быйыл  Перуттан тиийэ кыттааччылар бааллар, онон олус интэриэһинэй буолуо. Бу куонкурус – «событийнай туризм» биир чаҕылхай хамсааһына, Саха сирин визитнэй карточката диэххэ сөп. Олус элбэх сайаапка киирбитэ. Дьүүллүүр сүбэ куонкуруска араас дойдуттан, ол иһигэр Дьокуускай бырааттыы куораттарыттан, 20 хамаанданы талбыта», – диэн быһа биэрии кэмигэр Дьокуускай култуураҕа уонна духуобунай сайдыыга управлениетын салайааччыта Сардана Брызгалова кэпсээтэ.

Саҥа дьыллааҕы харыйа күлүмүрдүү умайыа

Орджоникидзе болуоссатыгар туруоруллубут куорат сүрүн харыйатын уотун үгэс быһыытынан ахсынньы 1 күнүгэр 17.00 чааска үөрүүлээх быһыыга-майгыга уматыахтара.  Харыйа уотун уматар үөрүүлээх түгэнигэр Тымныы полюһуттан, аан дойду саамай тымныы чыпчаалыттан, Тымныы символа кэлэрэ күүтүллэр.

«Чысхаан уонна Зимушка-Зима кыттыылаах харыйабытын чаҕылхайдык уонна кыраһыабайдык уматыахпыт. Улуу Устюг Тымныы оҕонньорун кытта билиҥҥитэ кэпсэтии ыыта сылдьабыт, хайа да түгэҥҥэ Тымныы оҕонньор баар буолуо. Харыйа уота умайбытын кэннэ, номнуо үгэс буолбутунан, болуоссаттан бырааһынньыктааҕы автоколонна айанныа. Манна куорат тэрилтэлэриттэн олус элбэх сайаапка киирдэ. Саҥаны киллэрии быһыытынан ростовой куукулалары (персонажтарынан анимация көстүүмэ – аапт.) уонна музыканан доҕуһуолу былаанныыбыт, – диэн Сардана Семеновна иһитиннэрдэ.

«Саха сирин амтана»

«Саха сирин амтана» гастрономическай бэстибээлгэ Дьокуускай куорат эрэстэрээннэриттэн уопсайа 12 хамаанда күрэс былдьаһыа. «Махтал», «Муус Хайа», «Река, озеро, лес» уо.д.а.

«Билигин бэстибээл хедлайнера (тэрээһиҥҥэ сүрүн болҕомтону тардар кыттааччы – аапт.) кэлэр боппуруоһа быһаарыллар, тоҕо диэтэххэ сылтан сыл хайаан да гастрономическай бэстибээлгэ анаан хайа эмэ киэҥник биллэр ыалдьыт кэлэр».

«Тоҥ балык-2025»

«Тоҥ балык-2025» тоҥ балыгы кыһыы үөрүйэхтэрин сыаналыыр куонкурус сэтинньи 30 күнүгэр үгэс курдук «Өрөгөй» спорт уораҕайыгар күнүс 12.00 ч. 18.00 ч. диэри ыытыллыа. Манна 16 хамаанда балыгы кыһыыга, астааһыҥҥа маастарыстыбаларын, үөрүйэхтэрин көрдөрөн күрэхтэһиэхтэрэ. Тэрийээччилэр бэлиэтииллэринэн, быйыл көрөөччүлэр миэстэтигэр балыгы амсайар кыахтара суох буолуо, ол оннугар олохтоох оҥорон таһаарааччылар атыы-эргиэн дьаарбаҥкалара тэриллиэ. Тэрээһиҥҥэ киирии босхо.

«12.00 ч. «Өрөгөй» иһигэр номнуо араас тэрээһин ыытылла туруо. Ыалдьыттары «Зима-фест» тэрээһиннэрэ – оҕолорго уонна улахан дьоҥҥо интерактивнай оонньуулар, куонкурустар – тоһуйуохтара. 13.00 ч. аренаҕа оҕолорго аналлаах көрдөрүү саҕаланыа. Оҕо искусство оскуолата манна олус интэриэһинэй бырагырааманы бэлэмнии сылдьар», – диэн кэпсээтэ управление салайааччыта.

«Саха быһаҕа» куонкурус бастакытын ыытыллыа

Куонкуруска кыттарга 8 маастар талыллыбыта, куонкурус блиц көрүҥүнэн ыытыллыа, чопчу чаас аҥаара кэмҥэ. Быйыл хайдах барарыттан көрөн, кэлэр сыллары толкуйдуохпут. 15.00 ч. сүрүн куонкурус саҕаланыа, – диэтэ эфири түмүктүүрүгэр Сардана Брызгалова.

Хаартыскалар: 2024 с. «Кыһын Саха сириттэн саҕаланар» бэстибээл түгэннэрэ, Дьокуускай уокуруктааҕы дьаһалтатын сайтыттан

Дьокуускайга ыытыллар «Кыһын Саха сириттэн саҕаланар-2025» бэстибээл сүрүн тэрээһиннэрэ:

Сэтинньи 23 күнэ

«Кыһын Саха сириттэн саҕаланар» бэстибээли үөрүүлээхтик арыйыы. «Саха сирин бирилийээннэрэ», «Саха сирин амтана» уонна «Тоҥ балык-2025» куонкурустар кыттыылаахтарын бырайыактарын быыстапката.

Буолар сирэ: П.А. Ойуунускай аатынан Саха академическай тыйаатыр.

Сэтинньи 24 күнэ

Муус оҥоһуктарга блиц-турнир.

Буолар сирэ: Орджоникидзе болуоссата.

Сэтинньи 25-30 кк.

«Саха сирин бирилийээннэрэ» норуоттар икки ардыларынааҕы муус уонна хаар оҥоһуктар куонкурустара:

Сэтинньи 25-27 кк. – муус оҥоһуктары оҥоруу.

Сэтинньи 28-29 кк. – хаар скульптуралары оҥоруу.

Сэтинньи 30 күнэ – дьүүллүүр сүбэ үлэтэ, түмүктэри таһаарыы.

Буолар сирэ: 202-с түөлбэ, «Северное сияние» муус паарката.

Сэтинньи 28 күнэ

«Теплая зима (хаттык таҥас)» – «Кыбытык абылаҥа» Дьокуускайдааҕы иистэнньэҥнэр устуудьуйаларын кыһыҥҥы таҥаһы көрдөрөр дефилелэрэ.

Буолар сирэ: «Арчы дьиэтэ» духуобунай култуура киинэ.

Сэтинньи 29 күнэ

«Зиму осилит идущий» – Кыайыы 50 сылыгар аналлаах скандинавскайдыы хаамыыны таптааччылар кулууптарын арыйыы.

Сэтинньи 30 күнэ

«Өрөгөй» спорт комплексыгар буолар тэрээһиннэр:

11.00 ч. «Зимние фантазии» олохтоох оҥорон таһаарааччылар сувенирдарын быыстапка-дьаарбаҥкалара.

12.00 ч. «Путешествие за вкусом» Арктикатааҕы куукуна быыстапката.

12.00 ч. «Зимаfest» дьиэ кэргэн интерактивнай туоната.

13.00 ч. «Тайна царства вечной мерзлоты» Дьокуускайдааҕы оҕо искусство оскуолатын ырыалаах-үҥкүүлээх туруоруута.

14.00 ч. «Новогодняя сказка в стране Олонхо» – «Саха сирин бирилийээннэрэ» оҕо театрын образцовай кэлэктиибин ырыа-үҥкүү испэктээгэ.

15.00 ч. «Тоҥ балык-2025» – балыгы кыһыы, астааһын куонкуруһа.

«Саха быһаҕа» – тимир уустарын күөн күрэстэрэ.

Ахсынньы 1 күнэ

17.00 ч. Орджоникидзе болуоссатыгар куорат Саҥа дьыллааҕы сүрүн харыйатын уотун уматыы.

17 ч. 10 м. Дьокуускай тэрилтэлэрин бырааһынньыктааҕы автоколонналарын айана.

18.00 ч.  Култуура уонна сынньалаҥ пааркатын Саҥа дьыллааҕы харыйатын уотун уматыы.

Ахсынньы 2 күнэ

16.00 ч. «Зимние узоры» XIII уруһуй күрэҕин кыайыылаахтарын чиэстээһин, киирбит үлэлэр быыстапкалара.

Буолар сирэ: Ю.А. Гагарин аатынан култуура уонна аныгы искусство киинэ.

Маны таһынан Дьокуускай куорат уокуруктарынан үгүс тэрээһин ыытыллыа.