Дьокуускайга Култуура сыла икки бөдөҥ эбийиэги бэлэхтиэҕэ

Үс мэндиэмэннээх, 9,5 тыһ. кв/м кэриҥэ иэннээх Музыка үрдүкү оскуолатын дьиэтигэр 240 миэстэлээх оскуола уонна 150 миэстэлээх интэринээт, кэнсиэртиир саала, библиотека, устуудьуйа, фонотека кэбиниэтэ спорт саалата, о.д.а. баар буолуохтара.

Санатар буоллахха, 2024 сыл бэс ыйын 18 күнүгэр Владимир Путин Дьокуускайга кэлэ сылдьан 2024-2026 сылларга федеральнай бүддьүөттэн тутууну түмүктүүргэ уонна музыкальнай инструменнары атыылаһарга сөптөөх үбүлээһини көрөргө сорудахтаабыта.

 

Арктикатааҕы эпос уонна искусство киинэ – 33 тыһ. кв. миэтэрэ иэннээх, 36 миэтэрэ кэриҥэ үрдүктээх бөдөҥ эбийиэк. Манна аныгы оборудованиенан хааччыллыылаах филармония, репетициялыыр, мультимедийнай, сиэр-туом ыытар, о.д.а. саалалара баар буолуохтара.

Эбийиэк 2025 сылга үлэҕэ киириэхтээҕэ дизайн-бырайыакка уларытыы – эбии, дьиэ үрүтүгэр, үһүс сцена – киирэн, 2026 сылга көһөрүллүбүтэ.

 

Куорат, өрөспүүбүлүкэ олохтоохторо Дьокуускайга «Якутия – территория роста» федеральнай тур чэрчитинэн кэлбит дойду бөдөҥ СМИлэрин бэрэстэбиитэллэрин көмөлөрүнэн тутулла турар Эпос уонна искусство киинин иһигэр «киирэн», классическай музыканы истэр кыахтаннылар. Бөдөҥ таһаарыылар суруналыыстара сцена акустикатын үрдүктүк сыаналаабыттара, Уһук Илиҥҥэ биир бастыҥ эбийиэк буолар тутуу түмүктэнэн эрэрин бэлиэтээбиттэрэ билиннэ.

Эпос уонна искусство киинэ Музыка үрдүкү оскуолатын курдук Дьокуускай куорат маастар-былааныгар киирбит эбийиэктэр.

Бэлиэтээн эттэххэ, Дьокуускай куорат төрүтэммитэ 400 сылын чыҥха атын, үрдүк таһымҥа көрсөр сорук турбута. Онуоха анаан дойду баһылыга Владимир Путин өйөбүлүн ылбыт 2030 сылга диэри олоххо киирэр болдьохтоох маастар-былаан ылыллыбыта. Бу үөһээ этиллибит, быйыл үлэҕэ киириэхтээх икки бөдөҥ эбийиэги таһынан култуура эйгэтигэр өссө элбэх, атын тутуулар баар буолуохтара.

Ол курдук, куорат үс бөдөҥ уокуругар – Строительнай, Октябрьскай уонна Сайсары – 500-түү миэстэлээх, Хатаска 350 миэстэлээх 4 Оҕо искусствотын оскуолалара үлэҕэ киириэхтэрэ.

Пригороднай сэлиэнньэтигэр уонна Кангалаас бөһүөлэгэр Култуура дьиэлэрэ тутуллуохтара.

Дьокуускай куорат маастар-былаана уопсайа 449 млрд солк. үбүлээһиннээх 90 тэрээһини хабар.