Дьокуускайга «Куб Холода» саҥа арт-эбийиэк баар буолуоҕа

Сонун эбийиэк Ленин проспегын уонна Курашов уулуссатын быһа охсуһууларыгар баар искибиэргэ туруоҕа, диэн Саха сиригэр туризмы сайыннарыыга уонна территориальнай маркетиҥҥа агентствоҕа иһитиннэрдилэр.

«Билигин «Московскай» диэн аатынан биллэр бу искибиэр сотору кэминэн куорат биир бастыҥ уопсастыбаннай туонатыгар кубулуйуоҕа. Онно «Куб Холода» арт-эбийиэк сүрүн миэстэни ылыаҕа», – диэн бэлиэтииллэр агентствоҕа.

Бырайыак быһыытынан, «Куб Холода» диэн 3×3 миэтэрэ кээмэйдээх өстүөкүлэ эбиэйик халлаан туругуттан, дьыл кэмиттэн тутулуктанан, иһиттэн сырдыы, уларыйа турар көстүүлээх, онно дьүөрэлии уоттаах-күөстээх буолуоҕа. Эркиннэрэ тымныы туһунан номохторго олоҕурар хартыыналары, Дьыл Оҕуһун халандаарын көрдөрөр былаһаакка буолар аналлаах. Онон куорат олохтоохторо, ол иһигэр оскуола үөрэнээччилэрэ, устудьуоннар куораты кытта билсиһии экскурсияларын саҕалыыр, Саха сирин, Дьокуускай куорат историятын, култууратын, айылҕатын тула кэпсэтиилэри саҕалыыр бэлиэ сирдэрэ буолуоҕа, диэн Ил Дархан уонна Бырабыыталыстыба пресс-сулууспата иһитиннэрэр.

Ил Дархан уонна Бырабыыталыстыба пресс-сулууспата