Дьокуускайга – киинэ бэстибээлэ

От ыйын 4-8 күннэригэр Дьокуускайга VIII норуоттар икки ардыларынааҕы киинэ бэстибээлэ (ЯМКФ) ыытыллыа. Быйылгы бэстибээлгэ аҕыс тас дойду кыттар – Кытай, АХШ, Монголия, Непал, Италия, Иран, Франция уонна Бразилия.

ЯМКФ историятын сэгэтэн көрөр буоллахха, аан бастаан 2011 с. ыытыллыбыт «Кино Арктики» өрөспүүбүлүкэтээҕи киинэ бэстибээлиттэн силис тардар. Бу бэстибээлгэ продюсер, режиссер Сергей Сельянов, звукорежиссер Алиакпер Гасан-Заде, кинокириитик Сергей Анашкин уо.д.а.  Арассыыйаҕа биллэр-көстөр кинематографистар кыттыбыттара. «Кино Арктики» эрэгийиэҥҥэ кинематограф сайдар кыахтааҕын көрдөрбүтэ, Арассыыйа араас эрэгийиэннэрин икки ардыларыгар култуура ситимэ бөҕөргүүрүгэр көмөлөспүтэ. Кэнэҕэһин Дьокуускайдааҕы норуоттар икки ардыларынааҕы киинэ бэстибээлин тэрийэргэ тирэх буолбута. 

ЯМКФ билиҥҥи аатынан аан бастаан 2013 с. сайын атырдьах ыйыгар ыытыллыбыта. Оттон 2019 с. VI төгүлүн ыытыллар ЯМКФ-ны РФ култуураҕа министиэристибэтэ дойду үрдүнэн ыытыллар киинэ бэстибээллэрин испииһэгэр киллэрбитэ.

VIII Дьокуускайдааҕы норуоттар икки ардыларынааҕы киинэ бэстибээлин дириэктэрэ –  киинэ артыыһа, продюсер, «Сахафильм» национальнай хампаанньа дириэктэрэ  Алексей Егоров.

Программнай дириэктэр – биллиилээх киинэ кириитигэ, ырытааччы Егор Москвитин.

Быйыл 8-с төгүлүн ыытыллар бэстибээл киһи аймах сыаннастарын уонна идеалларын тула дьону түмэр кыахтаах чаҕылхай тэрээһин буолара күүтүллэр. Бэстибээл куонкуруһун бырагырааматынан экософияҕа (экология бөлүһүөпүйэтэ) олоҕурбут киһи уонна айылҕа сыһыаннаһыыларын тиэмэтэ өрө тутуллуо. Ол курдук, Арассыыйа уонна тас дойдулар кинематографистара киһи тулалыыр эйгэни кытта дьүөрэлэһэн олоруутун, үгэстэри, култуурунай нэһилиэстибэни харыстааһын боппуруостарын таарыйар ис хоһоонноох киинэлэрин билиһиннэриэхтэрэ. Киинэлэри анал көрдөрүү «Лена», «Киин» уонна «Синема киин» киинэ тыйаатырдарыгар буолуо.

Быйылгы киинэ бэстибээлигэр дьүүллүүр сүбэ 9 номинацияҕа «Хаар ачыкытын» (чарапчыны) туттарыа.

«Үлэ кыбартаала» официальнай саайтыгар сүрүн куонкуруска дьүүллүүр сүбэҕэ үлэлиир дьон испииһэгин таһаарда. Ол курдук, быйылгы бэстибээлгэ дьүүллүүр сүбэҕэ үлэлиэхтэрэ:

Дали Окропиридзе  (Грузия) – киновед, киинэ кириитигэ, Арассыыйа араас куораттарыгар ыытыллар Грузия киинэтин күннэрин тэрийээччи;

Сьяризан МД Иса (Syarizan Md Isa) – Aquila Emas Sdn Bhd хампаанньа дириэктэрэ, продюсер;

Дальмира Жиргалбаевна Тилепбергенова – режиссер, продюсер, сценарист, Кыргызстан кинематографистарын сойууһун чилиэнэ, элбэх киинэ ааптара, режиссердар үрдүкү куурустарын выпускнига;

Анашкин Сергей Сергеевич – Арассыыйатааҕы киинэ кириитигэ, азиатскай киинэлэргэ эксперт, «Золотой овен» бириэмийэ экспердэрин сүбэтин чилиэнэ.

Семенов Иван Иванович – киинэ оператора, Саха сирин биир бастыҥ кинематографиһа, Арассыыйа кинематографистарын сойууһун чилиэнэ, «Чыпчаал» профессиональнай киинэ бирииһин хаһаайына.

«Сахафильм» хампаанньа иһитиннэрэринэн, бэстибээли үөрүүлээхтик арыйыы тэрээһинэ от ыйын 4 күнүгэр Саха академическай тыйаатыр аттыгар  П.А. Ойуунускай пааматынньыгын иннигэр 17:00 ч. саҕаланыа. Тэрийээччилэр быйылгы бэстибээл биир уратытынан үгэс курдук туттуллан кэлбит кыһыл дорожка оннугар маҥан тэлгэниэ диэн  иһитиннэрэллэр. Тэрээһини шоумен Эдуард Гаврильев-Эдик Якут ыытыа.

Оттон VIII ЯМКФ түмүктүүр тэрээһинэ от ыйын 8 күнүгэр Саха тыйаатырыгар буолуо. Манна бэстибээл кыайыылаахтарын ааттыахтара. Бу туһунан «Сахафильм» хампаанньа пресс-сулууспата иһитиннэрэр.

ЯМКФ эмблемата уонна сүрүн бирииһэ – үрүҥ көмүстэн оҥоһуллубут Улахан Араҥас сулуһу (Большая Медведица) ойуулаан көрдөрөр цирконий таастардаах, Хотугу сулуһу бэлиэтиир бриллианнаах хаар ачыкыта (чарапчы).

Хаартыска: «Сахафильм» телеграм-ханаалыттан