Дьокуускайга хаары тиэйии уонна ууну оборторуу үлэтэ күүһүрэр

Территорияны сааскы санитарнай ыраастааһын ыстааба сарсыардааҥҥы былаанныыр сүбэ мунньаҕар Дьокуускай куорат баһылыгын солбуйааччы Владислав Слепцов уокуруктар, хомунаалынай сулууспалар уонна ЕДДС ааспыт күннэргэ ыыппыт үлэлэрин отчуотун иһиттэ.
"Якутдорстрой" АУо иһитиннэриитинэн хаары хомуйар уонна тиэйэр үлэҕэ тэрилтэ туох баар тиэхиньикэтэ тахсан, төгүрүк сууккаҕа үлэлии сылдьаллар. Халааны утары үлэ күүһүрдүллүбүт:  куорат ууну сүүрдэр, уопсайа 57 тыһ.м. уһуннаах, холлоҕосторуттан (лотоктарыттан)  18 тыһ. миэтэрэтэ паарынан ириэрдиллибит. Бу үлэ уопсай кээмэйин 31 %-на. Билигин паарынан ириэрии үлэтэ Тимирязев, Орджоникидзе, Ярославскай, Петр Алексеев, Поярков уулуссаларыгар, М.Е. Николаев проспегар уонна Горканалга ыытыллар. 

"Якутдорстройга" пассажирдарга куттал суох буолуутун хааччыйарга оптуобус тохтобулларыгар кумаҕы кутуу үлэтин күүһүрдэллэригэр сорудахтанна.
"Жилкомсервис" МУТ куорат намтал сирдэригэр мустар ууну хачайдыырга үлэ тэтимнээхтик барарын иһитиннэрдэ. Ааспыт сууккаҕа 105 куб. м ууну хачайдаабыттар. Хаар ууллуоҕуттан уопсайа 5400 куб. м уу оборторуллубут. Ууну оборторууга былааннаах үлэни таһынан олохтоох дьон Дьокуускайдааҕы Кэлим дьуһуурунай-диспетчерскэй сулууспа нөҥүө киллэрбит сайаапкаларынан үлэ ыытылларын иһитиннэрдилэр.
Дьокуускайдааҕы ЕДДС күн бүгүн куорат олохтоохторуттан киирбит 22 сайаапканан үлэ бара турарын, мантан 15-һэ ирбит хаар уутун хачайдааһыҥҥа, оттон 7-тэ хаары тиэйиигэ буоларын иһитиннэрдэ.
Бүгүҥҥү сүбэ-мунньаҕы түмүктүүргэ уокуруктар быраабаларыгар уонна куорат кытыытынааҕы бөһүөлэктэр дьаһалталарыгар ордук улахан кыһалҕалаах сирдэргэ үлэни күүһүрдэллэригэр, салайар хампаанньалар чалбах уутун хачайдыырга тиэхиньикэлэрэ тиийэрин суоҕун бэрэбиэркэлииллэригэр сорудах бэрилиннэ.

Дьокуускай куорат баһылыгын солбуйааччы Владислав Слепцов  чалбах уутун оборторууну, хаары, бөҕү тиэйиини уулуссалартан уонна саахалланар кутталлаах дьиэлэр тастарыттан ордук күүһүрдэр наадатын ыйда. Сатыы сылдьар дьоҥҥо куттал суох буолуутун хааччыйарга тротуардарга кумаҕы куталларыгар соруйда.
"Муус устар 8 күнүттэн, сөҥүү түһэрэ эрдэттэн күүтүллэр буолан, күүһүрдүллүбүт бэлэм буолуу эрэсиимэ киллэриллибитэ. Быраабаларга хаары тиэйиигэ үлэ кээмэйэ эбилиннэ. Ааспыт сылга сөҥүү түһүүтэ биллэ элбэҕэ. Ол эрээри кулун тутар бүтүүтэ, муус устар саҕаланыыта хаар түспэтэҕин кэриэтэ этэ. Маны таһынан былырыын ууну оборторуу үлэтэ муус устар 10 күнүттэн саҕаламмыта, оттон быйыл халлаан туругунан муус устар 1 күнүттэн саҕалаатыбыт. Биир үксүн ууну оборторуу үлэтэ муус устар ортотуттан саҕаланааччы," – диэн Владислав Слепцов санаатын үллэһиннэ.

Хаары тиэйиигэ уонна ууну хачайдааһыҥҥа сайаапкалары Дьокуускай куорат Кэлим дьуһуурунай-диспетчерскэй суоууспатыгар 44-45-64 нүөмэргэ эрийэн биэриэххэ сөп.

 Дьокуускай куорат уокуруктааҕы дьаһалтатын пресс-сулууспата иһитиннэриитинэн