Дьокуускайга Гавриил Чиряев скверигэр бэлиэ тэрээһин буолла
Бэҕэһээ, муус устар 4 күнүгэр, СӨ уһулуччулаах судаарыстыбаннай уонна политическай диэйэтэлэ, Аҕа дойду Улуу сэриитин кыттыылааҕа Гавриил Иосифович Чиряев төрөөбүтэ 100 сылын бэлиэтиир тэрээһин кини аатынан сквергэ үөрүүлээх быһыыга-майгыга буолла. Бу бэлиэ күҥҥэ Гавриил Чиряев пааматынньыгар сибэкки дьөрбөтүн уурдулар.
– Гавриил Иосифович Чиряев саҕана өрөспүүбүлүкэ соҕуруу территориятын производственнай комплексын сүүнэ кыахтаах базата оҥоһуллубута. Гавриил Иосифович олоҕун тухары үгүһү оҥорбута, кини үлэтэ, киллэрбит кылаата билиҥҥи кэм салайааччыларыгар үрдһктү сыаналанар, норуот туһугар бэйэни харыстаммакка үлэлээһин холобура буолар, – диэн Ил Түмэн бэрэссэдээтэлэ Алексей Еремеев Гавриил Иосифович өрөспүүбүлүкэ сайдарыгар үгүһү оҥорбутун бэлиэтээтэ.
СӨ Бырабыыталыстыбатын бэрэссэдээтэлин солбуйааччы Анатолий Семенов Гавриил Чиряевка анаммыт тэрээһиннэр тустарынан сырдатта, Гавриил Иосифович Саха сирин гаастааһыҥҥа бигэ кылааттааҕын аҕынна.
СӨ норуот дьокутаата, Дьокуускайдааҕы КПРФ рескомун сэкирэтээрэ Иннокентий Романов Гавриил Чиряев Саха сирин историятыгар бөдөҥ бэлитиичэскэй фигура буоларын уонна кини олоҕун, үлэтин дириҥник үөрэтэр наадалааҕын бэлиэтээн эттэ.
Оттон Дьокуускай куорат баһылыгын солбуйааччы Владимир Дорожкин тыл этэригэр Гавриил Чиряев уһулуччулаах үтүөтүн бэлиэтээн туран, үөлээннээхтэрэ кинини киһи быһыытынан хайдах-туох майгылааҕын ахтыбыттарын холобурдаата.
Маны тэҥэ бу бэлиэ тэрээһиҥҥэ Дьокуускайдааҕы национальнай гимназия дириэктэрин солбуйааччы Анатолий Чиряев уонна СӨ Ыччат Бырабыыталыстыбатын бэрэссэдээттэлэ Сергей Иванов тыл эттилэр.
Дьокуускай уокуруктааҕы дьаһалтатын пресс-сулууспатын матырыйаалларынан
Сонуннар
Ордук ааҕаллар
