Дьокуускайга эргэ сэргэлэри харайар сир тэриллиэҕэ

Сотору буолаат «уоруллубут» сэргэлэр Киин уокурук управатын таһыгар «тиийбиттэрэ» биллибитэ.

Киин уокурук управатын салайааччыта Феликс Антонов быһаарбытынан, сэргэлэр уоруллубатахтар, «Моя библиотека» оҕо библиотекатыгар киирэр ааҥҥа иккис сылларын быраҕылла сыппыттарын библиотека үлэһиттэрэ управаҕа биллэрбиттэр, дьаһалы ыларга көрдөспүттэр. Онон управа дьиэтин таһыгар аҕалан уурбуттар.

Феликс Антонов быһаарбытынан, библиотека турар Чернышевскай уул., 12/1  дьиэтин тиэргэнигэр «Главстрой» МКУ былырыын «1000 тиэргэн» бырагырааманан хапытаалынай өрөмүөн ыытар. Үлэни ыытар бэдэрээтчит «Основа» ХЭУо сэргэлэри тууран, тиэргэни аспааллаан кэбиһэр. Саҥа аспаалга былыргы сэргэлэргэ миэстэ суоттамматах... Чернышевскай, 12/1 элбэх кыбартыыралаах дьиэни хааччыйар ЦАДС Салайар хампаанньа эмиэ сэргэлэри туруорар миэстэ суоҕун этэр. Ол түмүгэр сэргэлэр библиотека иннигэр сытан «сүтэн» хаалаллар.

Атырдьах ыйын 11 күнүгэр управа үлэһиттэрэ олохтоохтору кытта сүбэлэһэн, ытык бэлиэлэргэ кэмниэ-кэнэҕэс миэстэ булан туруораллар. Детектив хабааннаах история итинэн этэҥҥэ түмүктэнэр - Киин уокурук салалтата норуот үгэстэригэр ытыктабыллаах сыһыанын көмөтүнэн.

Саха киһитигэр сэргэни алдьатар, кэрдэр, суулларар улахан аньыы. Оттон сууллубут сэргэни көлөлөммөккө, тыаҕа көтөҕөн таһааран, силбэһэ үүммүт икки тиит ардыгар уурар үгэс баара биллэр.

Дьокуускай куоракка, саха омук уутуйан олорор сирэ буолан, элбэх тиэргэҥҥэ, тэрилтэ, дьиэ таһыгар, аартык суолга былыргы да, аныгы да сэргэ сэргэ элбэх. Бу ытык бэлиэлэр дьон дьалаҕай сыһыаныттан, кэм-кэрдии да ыгыытыттан-түүрүүтүттэн алдьанар-кээһэнэр, сууллар түгэннэрэ тахсара баар суол. Ону хайдах харайары, туох сиэри-туому толорору киһи эрэ билбэт.

Саха сиригэр былыргы тутуулары, история уонна култуура пааматынньыктарын харыстыыр управление начаалынньыга Николай Макаров бэйэтин МАХ ханаалыгар Дьокуускайга эргэ сэргэлэри харайар сир тэриллиэн сөбүн иһитиннэрдэ. Нэһилиэнньэттэн маннык этии киирбитин управление үлэһиттэрэ Олохтоох дьаһалтаны кытта ылынан, икки барыйааны тобулбуттар: Владимировка уонна Үс Хатыҥ оройуоннара.

Биллэн турар, бу биир күннээх үлэ буолбатах.