Дьокуускайга элбэх оҕолоох ыалы өйүүллэр

Ааспыт сылга Арассыыйаҕа Дьиэ кэргэн, Саха сиригэр Оҕо саас сылларын чэрчитинэн элбэх оҕолоох ыалы өйүүргэ үгүс үлэ ыытылынна. Ол курдук, Дьокуускай куорат элбэх оҕолоох ыалларыгар сир учаастагын биэриини өйүүр дьаһаллар ылыллан толорулуннулар. Маны таһынан элбэх оҕолоох дьиэ кэргэн оҕолоро куорат уонна куорат кытыытынааҕы уокуруктар уопсастыбаннай тырааныспардарыгар босхо айанныыр, муниципальнай музейга төлөбүрэ суох сылдьар уонна оскуола аһылыгар чэпчэтиини туһанар кыахтаннылар.

Дьокуускай уокуруктааҕы дьаһалтатын пресс-сулууспата иһитиннэрбитинэн, быйылгы үөрэх дьыла саҕаланыыта куорат уопсай үөрэхтээһинин тэрилтэлэригэр 6-9-с кылаастарга 8 тыһ. кэриҥэ оҕоҕо, 10-11-с кылаастарга 1000-тан тахса үөрэнээччигэ аһылыкка чэпчэтии анаммыт. Манна куорат бүддьүөтүттэн 149 032,92 тыһ. солк. көрүллүбүт.

Уопсастыбаннай тырааныспарга босхо айанныыр картаны «Дьокуускай куораттааҕы нэһилиэнньэ көмүскэлин үлэҕэ салалтатыгар» учуокка ылыллыбыт элбэх оҕолоох ыал 1-11-с (12-с) кылааска үөрэнэр оҕолоро туһаналлар. Манна үстэн элбэх оҕолоох дьиэ кэргэн хабыллар. Картанан ыйга 96-та айанныахха сөп. Бу картанан оҕо, ыам ыйын толору киллэрэн туран, үөрэх дьыла түмүктэниэр диэри туһанар бырааптаах. Сайыҥҥы 3 ыйга бырайыас «Транспортная карта» тарибынан төлөнөр буолар.

Оҕону босхо бырайыаһынан хааччыйыы СӨ Ил Дарханын «СӨ элбэх оҕолоох дьиэ кэргэнин социальнай өйөбүлүгэр эбии миэрэлэр» ыйааҕыгар олоҕуран оҥоһуллар.

Маны таһынан балаҕан ыйын 1 күнүттэн элбэх оҕолоох ыал оҕолоро «Дьокуускай куорат историятын түмэлэ» муниципальнай музейы хаһан баҕаралларынан босхо көрүөхтэрин сөп.

Хаартыска: Дьокуускай уокуруктааҕы дьаһалтатын сайтыттан