Дьокуускайга Циолковскай хос сиэнэ ыалдьыттаата

Елена Тимошенкова ааҕыыларга мустубут дьоҥҥо ааспыт үйэ 30-с сылларыгар тэриллибит эдэр тиэхиньиктар ыстаансыйаларын туһунан кэпсээнигэр оҕолор сөмөлүөт макеттарын, радиоприемниктары, о.д.а. оҥорорго холоммуттар да, туохтан эрэ иҥнэн иһэллэрин кэпсээтэ.

«Инньэ гынан кинилэр мин хос эһэбэр Константин Эдуардович Циолковскайга сурук суруйарга быһаарыммытарра. Хос эһэм хоруйун «Комсомольская правда» хаһыат нөҥүө ыыппыта. Ол суругар оҕолорго маннык тыллары эппитэ: «Күндү оҕолор, күүскүтүн харыстааҥ, олоҕу тупсарыҥ, тохтоло суох үөрэниҥ уонна хаһан да санааҕытын түһэримэҥ!». Билигин мин Циолковскайдар аймах уонна Юрий Гагарин аатынан космонавтары бэлэмниир киин аатттарыттан бу тыллары эһиэхэ туһаайабын», – диэтэ Елена Тимошенкова.

Санатар буоллахха, быйылгы үбүлүөйдээх V научнай ааҕыыларга тыһыынчаттан тахса оҕо кыттыыны ылла, оттон бу сыллар тухары кинилэр күүстэринэн тыһыынчанан чинчийии ыытыллан, наукаҕа уонна космос киэҥ куйаарыгар бастакы хардыылар оҥоһулуннулар.

Бу үлэлэр, чуолаан Арассыыйа космонавтикатын ситиһиилэрин тарҕатыы иһин, быйыл Дьокуускай куоракка К.Э. Циолковскай аатынан уордьан уонна Ю.А. Гагарин аатынан мэтээл туттарылынна.