Дьокуускайга бастакы убойнай сыах арылынна

Бэлиэ тэрээһиҥҥэ СӨ тыатын хаһаайыстыбатын миниистирэ Артем Александров, куорат баһылыга Евгений Григорьев, Хатастааҕы «Баҕарах» сүөһү комплексын дириэктэрэ Иван Сивцев кыттыыны ыллылар.

Куорат баһылыга бу эбийиэк биир сүрүн суолтата, урукку өттүгэр хаһаайыстыбалар атыыга таһаарар эттэрин Нам, Хаҥалас улуустарыгар тиэйэн илдьэн идэһэлиир буоллахтарына, билигин куораттан ырааппакка астыыр кыахтаммыттарыгар сытарын бэлиэтээтэ.

Аныгылыы тутуулаах саҥа сыах бары ирдэбилгэ толору эппиэттиир – ыйыыр, көтөҕөр, тоҥорор оборудованиеттан саҕалаан, лабораторияҕа, үлэһиттэр сынньанар хосторугар тиийэ барыта баар, диэн иһитиннэрэр Олохтоох дьаһалта пресс-сулууспата.

Бэлиэтээн эттэххэ, Арассыыйа тыатын хаһаайыстыбатын министиэристибэтин 2022 с. муус устар 28 күнүнээҕи 269 №-дээх бирикээһинэн 2022 с. балаҕан ыйын 1 күнүттэн атыыга таһаарар эти тиэргэҥҥэ астыыр бобуллан турар.

2014 сыл от ыйын 1 күнүттэн маны сэргэ эти астыыр-таҥастыыр тэрилтэ нөҥүө ааспатах бородууксуйаны атыыга таһаарар бобулларын туһунан регламент үлэлиир. Ол эбэтэр нэһилиэнньэҕэ атыылыыр эт ас барыта анал сыах нөҥүө ааһыахтаах, тэлгэһэҕэ туттуллубут идэһэ бэйэ сииригэр эрэ ананар.