Дьокуускайга Арктикатааҕы эпос уонна искусство киинин уонна Адаптивнай комплексы тутуу былаан быһыытынан барар

Ил Дархан Айсен Николаев уонна куорат баһылыга Евгений Григорьев бүгүн Дьокуускайга икки бөдөҥ эбийиэги тутуу хаамыытын кытта билистилэр – Арктикатааҕы эпос уонна  искусство киинин кытта Доруобуйаларынан хаарчахтаах оҕолорго адаптивнай комплексы.
Санатар буоллахха, Арктикатааҕы эпос уонна искусство дьиэтигэр судаарыстыбаннай филармония, Олонхо тыйаатыра уонна Ойуунускай аатынан Саха академическай тыйаатыр киириэхтээхтэр, маны сэргэ быыстапкалыыр саала үлэлиэхтээх. Тутуу уопсай иэнэ 33 тыһ. кв. м тэҥнэһэр, үрдүгэ – 36,7 м. Көрөөччү саалата 1530 миэстэлээх.

Ааспыт 2024 сылга дьиэ каркаһа, фасада оҥоһуллубуттара, үс ураһа туруоруллубута. Ититии киирэн, билигин манна ис үлэ, сцена оҥоһулла тураллар. Ил Дархан тутааччылары болдьоҕу тутуһарга уонна хаачыстыбаны кичэйэргэ сорудахтаата.
Адаптивнай комплекс үөрэнэр куорпуһа 550 миэстэлээх, маны сэргэ 150 миэстэлээх интэринээттээх, 200 миэстэлээх оҕо саадтаах. Тутуу иэнэ 17 тыһ. кв. м тахса. Айсен Николаев сорудаҕынан тутуу кэлэр үөрэх дьылыгар үлэҕэ киириэхтээх, диэн иһитиннэрэр Олохтоох дьаһалта пресс-сулууспата.