Дьокуускайга – Архитектура нэдиэлэтэ

Киин куоракка алтынньы 6-10 күннэригэр Архитектура нэдиэлэтэ буолар. Тэрээһин «Олох инфраструктурата» национальнай бырайыак иитинэн ыытыллар.

Архитектура аан дойдутааҕы күнүгэр аналлаах тэрээһин идэлээх дьону, былаас бэрэстэбиитэллэрин, устудьуоннары уонна куорат эйгэтин сайдыытын интэриэһиргиир дьону түмүөҕэ.

Ол курдук, бу күннэргэ муниципальнай тэриллиилэр кылаабынай архитектордарыгар эргиччи туһалаах сэминээрдэр ыытылыннылар. «Кружало» атыы-эргиэн эрээттэригэр дьыалабыай бырагыраама буолан ааста.

Алтынньы 9 күнүгэр куораттар уонна холбоһуктар хардарыта дьайсыылара, сири-уоту сайыннарыыга олохтоох көҕүлээһиннэр суолталара, хотугу сир усулуобуйатыгар пааркалары үлэлэтии боппуруоһа, сири-уоту уларыта тутууга үп-харчы уонна тэрээһин, о.д.а. тиэмэлэр көтөҕүллүөхтэрэ. Бу күн Саха сирин Архитектордарын сойууһун аһаҕас кэпсэтиитинэн түмүктэниэҕэ.

Алтынньы 10 күнүгэр «Кружало» атыы-эргиэн эрээттэригэр Архитектура нэдиэлэтин түмүктүүр тэрээһин ыытыллыаҕа. Манна  «LETO» компетенция киинин кинигэтэ сүрэхтэниэҕэ, быыстапка, дьаарбаҥка, маастар-кылаастар уонна архитектурнай квиз тэриллиэхтэрэ.