Дьокуускайдааҕы прокуратура иһитиннэрэр

Үс киһи өлүүлээх суол саахалыгар холуобунай дьыала көбүтүлүннэ

Дьокуускай прокуратурата үс киһи өлүүлээх суол быһылааныгар РФ ИДьМ Дьокуускайдааҕы силиэстийэлиир управлениета РФ ХК 264-с ыст. 3 ч. (массыына ыытааччы суол быраабылатын кэһиититтэн, сэрэҕэ суоҕуттан киһи өлүүтүгэр тириэрдиитэ) көбүтүллүбүт холуобунай дьыаланы сокуоннайынан аахта.

Холуобунай дьыаланы көбүтэллэригэр, 2025 сыл кулун тутар 5 күнүгэр Дьокуускай куорат Ленин проспегын айан суолугар күнүс «Toyota Succeed» уонна «Toyota Land Cruiser» массыыналар харсыспыттара быһаарыллыбыт.

Суол быһылаанын түмүгэр «Toyota Succeed» суоппара уонна икки пассажира ылбыт эмсэҕэлээһиннэриттэн балыыһаҕа киирэн өрүттүбэккэ суорума суолламмыттар.

Холуобунай дьыаланы силиэстийэлиир үлэ барар, силиэстийэ хаамыыта прокуратура тус хонтуруолугар баар.

Дьону тиэйэр үлэлээхтэри бэрэбиэркэлээтэ

Дьокуускай куорат прокуратурата ИДьМ Дьокуускайдааҕы Госавтоинспекцияҕа отделын, Уһук Илиннээҕи Ространснадзор Саха сиринээҕи судаарыстыбаннай надзорун тэхиньиичэскэй надзорга исписэлиистэрин кытта пассажирдары тиэйиигэ сокуон ирдэбилин тутуһууну бэрэбиэркэлээтэ.

Бэрэбиэркэ кэмигэр рейскэ тахсыах иннинэ суоппар медицинскэй, оптуобус  тэхиньиичэскэй көрүүнү барыытыгар бэрээдэги кэһии, ону тэҥэ тырааныспар линияҕа дьиэктээх тахсыыта баара көһүннэ. Маны сэргэ сорох оптуобустар салоннарыгар ирдэнэр иһитиннэриилэри туруорбатахтара бэлиэтэннэ.

Суоппардары медицинскэй көрүүгэ эппиэттээх тэрилтэ салайааччытыгар РФ КоАП 11.32-с ыст., оттон дьиэктээх, алдьаныылаах оптуобустары линияҕа таһаарбыт икки хонтуруоллуур мэхээньиккэ РФ КоАП 12.31-с ыст. административнай дьыалалар көбүтүлүннүлэр. Маршруттар салайааччыларыгар уонна дьону тиэйиини тэрийээччигэ бу кэһиилэри туоратарга билиҥҥитэ көрүүгэ сылдьар көрдөрүү сурук түһэрилиннэ.

Оҕону халаабыт дьахтар дьыалата суукка утаарылынна

Куорат олохтооҕо дьахтары РФ ХК 1-кы ч. 161-с ыст. (халабыр) буруйдуур дьыала аактатын прокуратура бигэргэттэ.

Холуобунай дьыала матырыйаалыгар олоҕурдахха, буруйданааччы 2024 с. сэтинньитигэр Билибин уулуссатыгар баар дьиэ подъеһыгар, билэр киһитин оҕотун көрдөһүү быһыытынан оҕо саадыгар атаара туран, оҕо үрүсээгиттэн көрдөрөн туран суотабай төлөпүөнүн уорбут. Уорбут малын туппутунан буруйу оҥорбут сириттэн тэскилээбит. Эмсэҕэлээччи хоромньута 10770 солк. 

Прокурор бу дьыаланы суут көрүүтүгэр утаарда.

Такси массыынатын күрэтиигэ буруйданна

Куорат олохтооҕор РФ ХК 1-кы ч. 166-с ыст. (күрэтэн илдьэ барыы) холуобунай дьыала тэрилиннэ.

Дьыала матырыйааллара кэпсииллэринэн, буруйданааччы бу сыл тохсунньутун саҥатыгар арыгы испит туруктаах сылдьан таксига олорбут. Такси суоппара массыынатыттан тахсыбыт кэмин туһанан, буруйданааччы кини миэстэтигэр көспүт уонна массыынаны күрэтэн барбыт. Куорат устун хатааһылаан баран массыынаны Билибин уулуссатыгар баар дьиэ таһыгар хаалларбыт уонна онно ГИБДД үлэһиттэригэр тутуллубут.

Прокурор бу дьыаланы суут көрүүтүгэр ыытта.

Социальнай-көмүскэлэ суох дьон быраабын көмүскээтэ

Дьокуускайдааҕы прокуратура инбэлиит оҕолоох ийэ үҥсүүтүнэн култуура сокуона тутуһуллуутун бэрэбиэркэлээтэ.

Ол курдук, бэрэбиэркэ кэмигэр СӨ судаарыстыбаннай циркэтэ социальнай көмүскэлэ суох дьоҥҥо көрөр чэпчэтиилээх миэстэлэри чэпчэки сыаналаах икки секторга эрэ биэрэрэ быһаарыллыбыт.

Бу сэрии бэтэрээннэрин, СВО кыттыылаахтарын дьиэ кэргэттэрин, 1-кы группалаах инбэлииттэр, доруобуйаларыгар хааччахтаах оҕолор, тулаайахтар, элбэх оҕолоох дьиэ кэргэн курдук көмүскэлэ суох араҥаҕа киллэриллэр дьон бырааптарын сарбыйар усулуобуйаҕа олоҕуран, прокуратура циркэ дириэктэрин аатыгар көрдөрүү суругу түһэрдэ. Тэрилтэ чэпчэтиини көрөрүгэр сокуоннайа суох правовой аакталарын бырачыастыыры биллэрдэ.

Массыынатын былдьатта

Дьокуускайга дьахтар итирик туруктаах массыынаны иккистээн ыыппытын иһин «Toyota Land Cruser» массыыната конфискацияланна.  

Ол курдук, 37 саастаах куорат олохтооҕор РФ ХК 1 ч. 264.1 ыст. (итирик туруктаах тырааныспары иккистээн ыытыы) көбүтүллүбүт холуобунай дьыаланы куорат прокуратурата өйөөтө.

Суут кэмигэр быһаарыллыбытынан, массыынаны итирик туруктаах ыытан административнай эппиэтинэскэ тардылла сылдьыбыт буруйданааччы иккиһин маннык туруктаах «Toyota Land Cruser» массыынатын уруулугар олорбут.

Суут судаарыстыбаннай буруйдааччы санаатын учуоттаан туран, буруйданааччы дьахтары тырааныспары ыытыыны кытта ситимнээх үлэҕэ үлэлиир быраабын 2 сыл болдьохтоон быста, 250 чаас булгуччулаах үлэҕэ бириигэбэрдээтэ. «Toyota Land Cruser» массыынатын судаарыстыба суотугар конфискациялаата.

Бириигэбэр сокуоннай күүһүгэр киирэ илик.

Эдэр дьахтар быраабын көмүскээтилэр

2002 с. төрүөх куорат олохтооҕо прокуратураҕа киллэрбит үҥсүүтүнэн бэрэбиэркэлиир үлэ ыытылынна.

Бэрэбиэркэ быһаарбытынан, үҥсээччи оҕолонор кэмигэр олорор сиригэр регистрацията суоҕунан төрүөттээн өрөспүүбүлүкэттэн көрүллэр “Дети столетия” тус сыаллаах хапытаалы ыларын, биир кэмнээх төлөбүр көрүллэрин аккаастаабыттар. Маны таһынан тулаайах кыыс, кинини ииппэтэх, харайбатах ийэлээх аҕатын докумуонунан төрөппүт быраабыттан быспатах буоланнар, тулаайахтар олорор дьиэнэн хааччыллар испииһэктэригэр киирбэтэх эбит.

Манан сиэттэрэн прокуратура суутунан дьахтар төрүүр кэмигэр өрөспүүбүлүкэ территориятыгар олорбутун юридическайдык быһаарда, ону тэҥэ кини төрөппүт көрүүтэ суох хаалбыт оҕо буоларын бигэргэттэ.

Ылыллыбыт миэрэлэр түмүктэринэн эдэр ийэҕэ “Дети столетия” өрөспүүбүлүкэтээҕи тус сыаллаах хапытаал бэрилиннэ, кини аата дьиэнэн хааччыллар төрөппүт көрүүтэ суох хаалбыт оҕолор испииһэктэригэр киллэрилиннэ.

Счеттан харчыны уорууга буруйданна

Прокуратура Эдьигээн с. төрүттээх 23 саастаах дьахтары РФ ХК “в”, “г” пп., 3-с ч. 158 ыст. (баан счетуттан улахан кээмэйдээх уорууга) буруйдуур холуобунай дьыалатын бигэргэттэ.

Силиэстийэ көрдөрөрүнэн, буруйданааччы эр киһини кытта билсиһэн баран кини мобильнай сыһыарыытыгар киирбит уонна эр киһи аатынан кирэдьиит ылбыт. Кирэдьиит ылбыт сууматын, 408 тыһ. солк., бэйэтигэр ылбыт.

Буруйдуур түмүктээһин кэннэ холуобунай дьыала суут көрүүтүгэр утаарылынна. Бу дьыаланы РФ ИДьМ Дьокуускайдааҕы СУ силиэдэбэтэлэ силиэстийэлээтэ.

Түөкүттэр оҕону албыннаабыттар

Хара санаалаахтар Дьокуускай куорат оскуолатын үөрэнээччитигэр, үөрэх министиэристибэтин аатыттан тахсан, кыыһы төрөппүттэрин төлөпүөннэригэр баар баан сыһыарыыларынан харчы ыытарыгар итэҕэппиттэр.

Сокуоннай сааһын туола илик кыыс, сыыһа өйдөбүлгэ киллэриллэн, 100 тыһ. солк. харчыны, онно эбии 210 тыһ. солк. төрөппүттэрин аатыгар кирэдьиит ылан билбэт баанын счетугар ыыппыт. 

Бу холуобунай дьыала прокуратура хонтуруолугар ылыллан, силиэстийэлиир үлэ ыытылла турар.

Доруобуйаҕа ыарахан хоромньуну оҥорууга дьыала көбүтүлүннэ

Акушер-гинеколог бырааһы РФ ХК 2-с ч. 118-с ыст. (үлэ эбээһинэһин сөбө суох толорууттан, сэрэҕэ суох быһыыттан доруобуйаҕа ыарахан хоромньуну оҥорууга) буруйдаатылар.

Силиэстийэ көрдөрөрүнэн, 49 саастаах буруйданааччы эбээһинэһин сөбө суох толоруутун түмүгэр көрдөрөөччү дьахтарга “анатомический узкий таз” диагноһы туруорбатах, ол түмүгэр дьахтарга төрүүрүгэр барсыбат көрүҥ анаммыт.

Айылҕатынан төрөтүү кэмигэр оҕо тумнастар кутталлаах уустук түгэнэ үөскээн, “вакуум-экстракция” ньымата туһаныллыбыт. Ол түмүгэр кыһыл оҕо төрөөн тахсарыгар оһолломмут. Эксперт сыаналаабытынан, оҕо доруобуйатыгар ыарахан хоромньуну ылбыт.

Прокуратура бу буруйдуур түмүгү бигэргэтэн, суут көрүүтүгэр ыытта.

Көҥүлэ суох арыгы атыылаан сууттаныа

Дьокуускай куорат прокуратурата атыыһыт-кассир дьахтары РФ ХК 1 ч. 171.3 ыст. (сөптөөх лиссиэнсийэтэ суох арыгыны уонна испиирдээх бородууксуйаны улахан кээмэйинэн атыылаһыыга, харайыыга уонна биирдиилээн атыылааһыҥҥа) буруйдаата.

Силиэстийэ көрдөрбүтүнэн, 30 саастаах буруйданааччы Дьокуускай куорат арыгы маркетыттан кэмиттэн кэмигэр итирдэр бородууксуйаны атыылаһан, үлэлиир бородууктатын маҕаһыыныгар харайара, онтун нэһилиэнньэҕэ атыылыыра быһаарыллыбыт

Бэрэбиэркэ кэмигэр 160 тыһ. солк. суумалаах 545 бытыылка итирдэр утахтаах бородууксуйа былдьаммыт.

Бу дьыаланы прокурор суут көрүүтүгэр ыытта.

Алимент төлөөбөккө, көннөрөр үлэҕэ уураахтанна

48 саастаах куорат олохтооҕор РФ ХК 1 ч. 157-с ыст. (сокуоннай сааһын туола илик оҕотун көрүүгэ-харайыыга үбү-харчыны төлөөбөтөх, бу быһыы хаста да хатыламмыт буоллаҕына) көбүтүллүбүт дьыаланы прокуратура өйөөтө.

Суут кэмигэр буруйданааччы урукку кэмҥэ РФ КоАП 1-кы ч. 5.35.1 ыст. административнай эппиэтинэскэ тардылла сылдьыбыта, уһун кэмҥэ аахсыллар төрүөтэ суох икки сокуоннай сааһын туола илик оҕотун көрүүтүгэр алимент төлүүргэ миэрэ ылбатаҕа быһаарылынна. Төлөммөтөх иэһин уопсай суумата 170 тыһ. солк. тахса.

Суут эр киһини 6 ый хамнаһыттан 5 %-ны тутан туран, көннөрөр үлэҕэ уураахтаата.

Бириигэбэр билиҥҥитэ сокуоннай күүһүгэр киирэ илик.