Дьокуускайдааҕы прокуратура иһитиннэрэр

Тутуу матырыйаалын сыыһа харайан ыстарааптанна

Өрөспүүбүлүкэ прокуратуратын дьаһалынан Дьокуускай куорат прокуратурата «YKT.NOVOSTY» телеграм-ханаалыгар тутуу матырыйаалын харайыы уонна аҕырааданы көтүрүү туһунан көҥүлэ суох суруйуутун бэрэбиэркэлээтэ.

Бэрэбиэркэ түмүгүнэн куорат Кузьмин аатынан уулуссатыгар баар элбэх кыбартыыралаах олорор дьиэ тутуутугар тутууну ыытааччы матырыйаалын анала суох сиргэ харайбыта, аҕырааданы алдьаппыта быһаарылынна. Инньэ гынан тутааччы куораты тутуу сокуонун ирдэбилин кэспитэ көһүннэ.

Миэрэ ылыллан, ирдэбили кэһии туоратылынна. Дьокуускайдааҕы прокуратура уонна СӨ тутууга уонна дьиэни-уоту кэтээһиҥҥэ судаарыстыбаннай управлениетын көҕүлээһиннэринэн сокуону кэһээччи тэрилтэ салайааччыта РФ КоАП 1-кы ч. 9.4-с ыст. административнай эппиэтинэскэ тардылынна, ону тэҥэ 20 тыһ. солк. суумаҕа ыстарааптанна.

Биэнсийэлээхтэн иэһи тутууну бэрэбиэркэлииллэр

Дьокуускай куорат прокуратурата СИА иһитиннэрэр ааҕыныстыба доруобуйатыгар хааччахтаах эр киһи бырааба күөмчүлэммитин туһунан иһитиннэриитин  бэрэбиэркэлээтэ.

Иһитиннэрэр ааҕыныстыба суруйарынан, аҕам саастаах биэнсийэлээхтэн 2016 с. атыылаабыт дьиэтэ хомунаалынай өҥө төлөбүрүгэр иэстээх диэн биэнсийэтиттэн 31 тыһ. солк. тутан ылбыттар.

Прокуратура сокуону кэһии тахсыбытын суоҕун бэрэбиэркэлиир үлэтэ түмүктэннэҕинэ, туһааннаах миэрэлэр ылыллыахтара.

Быраабы кэһии хас даҕаны түгэнэ баара көһүннэ

В.П. Решетников аатынан өрөспүүбүлүкэтээҕи кырдьаҕастар уонна инбэлииттэр интэринээт дьиэлэригэр тохсунньу 3 күнүгэр 1956 с.т. төрүөх киһи өлбүтүн хойутаан булбуттарын туһунан иһитиннэрии араас ресурстарга тарҕаммыта. Дьокуускай куорат прокуратурата бэрэбиэркэлиир үлэни ыыппытын түмүгэр тэрилтэҕэ сокуону кэһии хас даҕаны түгэнэ баара көһүннэ: санитарнай-эпидемиологическай сокуоҥҥа, баһаартан сэрэхтээх буолууга, эминэн хааччыйыыга, социальнай өҥөлөрү көрүү усулуобуйаларыгар уонна бэрээдэктэригэр, ону тэҥэ интэринээт олохтооҕо сүппүтүн кэмигэр өйдөөн көрөн, төрүөтүн быһааран миэрэ ылбатахтарыгар, аҕам саастааҕы арыаллыыр үлэ толоруллубатаҕар.

Прокуратура Өрөспүүбүлүкэтээҕи кырдьаҕастар уонна инбэлииттэр интэринээт дьиэлэрин дириэктэрин эбээһинэһин толорооччу аатыгар көрдөбүлү түһэрдэ, ону тэҥэ эппиэтинэһи сүгэр дуоһунастаах үлэһиттэргэ административнай быраабы кэһиигэ дьыалалары көбүттэ: РФ КоАП 2-с ч. 19.20-с ыст. (анал көҥүлүнэн (лицензиянан) оҥоһуллар үлэни толорууга көрүллэр ирдэбили уонна усулуобуйаны кэһиигэ), 1-кы ч. 20.4-с ыст. (баһаартан куттал суох буолуутугар ирдэбили кэһиигэ), 2-с ч. 6.34-с ыст. (эмтээх препараттар кэлиилэрин кэтээн көрүү тиһигэр кэмигэр киллэрбэт буолууга эбэтэр чахчыта суох даннайы киллэриигэ), ону тэҥэ 6.28-с  ыст. (медицина изделиетин туһаныыга олохтоммут быраабыланы кэһиигэ).

Прокуратура толорбут аакталара көрүүгэ уонна хонтуруолга бааллар. Ону тэҥэ силиэстийэлиир уорган интэринээт дьиэ олохтооҕо суох буолуутугар ыыппыт бэрэбиэркэлиир үлэтин түмүгүн прокуратура хонтуруолга тутар.

Административнай эппиэтинэскэ тардылынна

Дьокуускай куорат прокуратурата “Триумф” – СӨ сүүмэрдэммит хамаандаларын спорка бэлэмниир өрөспүүбүлүкэтээҕи кииҥҥэ – бүддьүөт сокуонун кэһии баарын-суоҕун бэрэбиэркэлээтэ.

2024 с. атырдьах ыйыгар тэрилтэ судаарыстыбаннай сорудаҕы толорууга көрүллүбүт субсидия үбүн-харчытын сокуоннайа суох туһаммыта быһаарыллыбыт. Ол курдук, бу харчы Париж куоракка буолбут ХХХIII-с сайыҥҥы Олимпиадаҕа дириэктэр уонна икки үлэһит  командировкаҕа баран кэлбиттэригэр ороскуоттаммыт.

900 тыһ.солк. суумалаах бүддьүөт харчытын тус сыала суох туһаныы иһин “Триумф” спорт комплексын дириэктэрэ КоАП 15.14-с ыстатыйатынан административнай эппиэтинэскэ тардылынна, 20 тыһ. солкуобайга ыстарааптанна.

Баан картатын уоруу иһин сууттаныа

Куорат олохтооҕор УК “г” п. 3-с ч. 158-с ыст. (баан счетуттан уоран гражданиҥҥа улахан хоромньуну оҥоруу) көбүтүллүбүт холуобунай дьыалаҕа Дьокуускай прокуратурата буруйдааһыны бигэргэтэрин туһунан түмүгү ылынна.

Силиэстийэ көрдөрөрүнэн, буруйданааччы 2024 с. ахсынньы 29 күнүгэр күнүскү бириэмэҕэ Дьокуускай куорат Федор Попов аатынан уулуссатыттан баан картатын булбут. Карта пин-коду киллэрбэккэ контага суох төлөбүрү оҥорор функциялааҕын туһанан, маҕаһыынтан уопсайа 12 тыһ. тахса солк. суумаҕа атыыласпыт.

Буруйданааччы буруйун билиммит, бу буруйун туһа таһаарынар санааттан оҥорбутун быһаарбыт. 

Прокуратура буруйдуур түмүгү ылынан холуобунай дьыала салгыы суут көрүүтүгэр утаарылынна.

Массыынаны иккиһин итирик туруктаах ыытыы

33 саастаах Дьокуускай куорат олохтооҕун РФ УК 1-кы ч. 264.1-с ыстатыйатынан (итирик туруктаах сылдьан тырааныспары иккистээн ыытыы) судаарыстыбаннай буруйдааһыны прокуратура өйөөтө.

Суут кэмигэр быһаарыллыбытынан, буруйданааччы бу иннинэ эрдэ маннык буруйу оҥорууга тутуллан баран, итирии туругун быһаарар медицинскэй туоһулааһыны барартан аккаастанан, административнай эппиэтинэскэ тардылла сылдьыбыт.  Оттон 2024 сыл сэтинньитигэр  «Toyota GAIA» мааркалаах массыынатын уруулугар эмиэ итирик туруктаах олорон тутуллубут.

Суут судаарыстыбаннай буруйдааччы санаатын учуоттаан туран, сууттанааччыны 180 чаас булгуччулаах үлэҕэ бириигэбэрдээтэ. Тырааныспары ыытар быраабын 2 сыл болдьохтоон быста. Ону таһынан «Toyota GAIA» массыынатын судаарыстыба суотугар конфискациялаата.

Бириигэбэр билиҥҥитэ сокуоннай күүһүгэр киирэ илик.

Наркотигы атыылаһыы

РФ УК 228-с ыстатыйатынан (наркотиктаах сириэстибэни атыылыыр соруга суох кыра кээмэйинэн сокуоннайа суох булунуу, харайыы) куорат олохтооҕун буруйдуур холуобунай дьыала аактатын прокуратура бигэргэттэ. 

Бастааҥҥы силиэстийэ көрдөрөрүнэн, буруйданааччы Дьокуускай куорат Кангалаас микрооройуонугар олорон, бэйэтэ туһанар сыаллаах, интэриниэт ситимин туһанан наркотиктаах сириэстибэни – гашиһы (9,653 грамм)  – сакаастаабыт. Манна 49 тыһ. солк. төлөөбүт. Салгыы төлөпүөҥҥэ ыыппыт координаталарынан сирдэтэн, “кистиир сиргэ” тиийэн наркотигын булбут уонна массыынатыгар көһөрбүт. Ити курдук буруйданааччы оперативнай-көрдүүр үлэ кэмигэр буруйу оҥоруу сиригэр миэстэтигэр тутуллубут, наркотига былдьаммыт.

Бу холуобунай дьыала салгыы суут көрүүтүгэр утаарылынна.

СӨ прокуратуратын
матырыйаалларынан