Дьокуускайдааҕы балет оскуолата төрүттэммитэ 30 сыла

Ыам ыйын 30 күнүгэр Аксения уонна Наталья Посельскаялар ааттарын сүгэр Дьокуускайдааҕы балет оскуолата (колледж) төрүттэммитэ 30 сылын туолла. Бу кэм устата Саха сирин аар-саарга аатырдыбыт үөрэх кыһата барыта 214 исписэлииһи иитэн-такайан таһаарда, искусство чаҕылхай сулустарын көччөх гынан көтүттэ. 

Колледж иитиллээччилэрэ Арассыыйаҕа, Казахстаҥҥа, Кыргызстаҥҥа, Монголияҕа, Японияҕа, Соҕуруу Кореяҕа, Италияҕа, Соҕуруу Африка Өрөспүүбүлүкэтигэр тиийэ араас таһымнаах күрэхтэргэ ситиһиилээхтик кытталлар. Устудьуоннар Бүтүн Арассыыйатааҕы, норуоттар икки ардыларынааҕы куонкурустартан Гран-при, лауреат үрдүк аатын сүгэн, кыайыы көтөллөөх кэлэллэрэ, дипломант аатын ылан, үөрүү үктэллэнэллэрэ үгүс. Ону барытын ааҕан сиппэккин. Маны таһынан, Галина Уланова, Светлана Захарова Пуондаларын стипендиаттара, Бүтүн Арассыыйатааҕы «Молодые дарования России» күрэх кыайыылаахтара, СӨ Үүнэр көлүөнэтин тус сыаллаах пуондатын Гранын ылбыт устудьуоннар, СӨ Ил Дарханын стипендиаттара, СӨ Бастакы Бэрэсидьиэнэ М.Е. Николаев «Билиигинэн кыайыаҥ!» Судаарыстыбаннай истипиэндьийэтин лауреаттара бааллар.      

Үөрэнээччилэр уонна устудьуоннар Д.К. Сивцев-Суорун Омоллоон аатынан Опера уонна балет судаарыстыбаннай тыйаатырыгар производственнай практикаларын ааһаллар,  «Дон Кихот», «Щелкунчик», «Баядерка», «Золушка», «Спящая Красавица», «Лебединое озеро», «Ромео и Джульетта», «Спартак», «Кармен», о.д.а. көрөөччү билиниитин ылбыт испэктээктэргэ кытталлар.

Биһиги выпускниктарбыт Суорун Омоллоон аатынан Опера уонна балет судаарыстыбаннай тыйаатырыгар балет труппатыгар, С.Зверев-Кыыл Уола аатынан Үҥкүү национальнай тыйаатырыгар уонна өрөспүүбүлүкэ араас муннуктарыгар эбии үөрэхтээһин тэрилтэлэригэр айымньылаахтык үлэлииллэр. Сорохтор Арассыыйа уонна тас дойдулар идэтийбит тыйаатырдарыгар – Новосибирскай, Омскай, Екатеринбург, Ижевскэй, Самара, Москва, Сеул, Нью-Йорк, София куораттарга айа-тута сылдьаллар. Ону сэргэ, Москваҕа, Санкт-Петербурга, Кытайга үрдүк үөрэх кыһаларыгар салгыы үөрэнэ барбыттар бааллар. 

Чаҕылхай выпускниктарбытын киэн тутта ааттыыбыт:  РФ уонна СӨ үтүөлээх артыыһа Екатерина Тайшина, СӨ норуодунай артыыһа Сарыал Афанасьев, СӨ үтүөлээх артыыстара Анатолий Попов, Мария Гоголева, Ренат Хон, Юлия Мярина, Владислав Попов, Изабелла Егорова, Павел Необутов, Динара Гасанбалаева уо.д.а.

Колледжка улахан куонкуруһу ааһан киирэллэр. Биир миэстэҕэ ортотунан 17 оҕо туттарсар. Дьоҕурдаах оҕолору таба көрөн сүүмэрдиир тиһиктээх үлэ ыытыллар. Күн бүгүн Саха сирин араас муннуктарыттан – 15 улуустан, Дьокуускай куораттан, куорат таһынааҕы нэһилиэктэртэн барыта 100 оҕо балет искусствотыгар уһуйуллар. Уопсайга 50 оҕо олорор. Маны таһынан, Япония Фукуока уонна Коби куораттарыттан үөрэнээччилэр стажировканы аастылар. Манна даҕатан эттэххэ, быйыл 7-с кылааһы бүтэрбит оҕолору 8-с кылааска, "Народное отделение" салааҕа сүүмэрдииллэр.

Үөрэх кыһатын үөрүүлээх үбүлүөйэ киэҥ далааһыннаахтык бэлиэтэннэ. Ол курдук, ыам ыйын 23 күнүгэр 2 №-дээх Бырабыыталыстыба дьиэтигэр өрөспүүбүлүкэ салалтата, тумус туттар дьоно кыттыылаах уопсастыбаннас мунньаҕа ыытылынна. Бу күн колледж үлэһиттэрэ судаарыстыба уонна биэдэмистибэ таһымнаах наҕараадалары туттулар.

Нөҥүө күнүгэр Көлүөнэлэр көрсүһүүлэрэ ураты истиҥник буолан ааста. Выпускниктар, бэтэрээн педагогтар эйэҕэс эҕэрдэлэрин, сылаас ахтыыларын иһиттибит. Арассыыйа араас муннуктарыттан, тас дойдулартан, анал байыаннай дьайыы буола турар сирдэриттэн выпускниктарбыт видеонан эҕэрдэлэрин тутан, ордук долгуйдубут. 

Ыам ыйын 28 күнүгэр ытык-мааны бэтэрээннэрбитин ыҥыран, үлэһиттэр буолан Табаҕа тумуһугар үбүлүөйдээх ыһыахпытын ыстыбыт. Балет оскуолатын сайдыытыгар дьоһун кылааттарын киллэрбит дьоммутун кытта ирэ-хоро кэпсэтэн, үөрэн-көтөн тарҕастыбыт.

Ыам ыйын 30 күнүгэр Опера уонна балет тыйаатырын үрдүк сыанатыгар икки салаалаах улахан Гала-кэнсиэр буолан ааста. Кэрэ киэһэбитин кыра, орто кылаастарбыт үөрэнээччилэрэ, 2-с  куурус устудьуоннара уонна араас кэмҥэ бүтэрбит выпускниктарбыт киэргэттилэр. 

Хаартыскалар: Дьокуускайдааҕы балет оскуолатын архыыбыттан