Дьокуускай сапыраапкаларыгар гаас-мотуор уматыга эбии кэлиэҕэ

Балаҕан ыйын 10 күнүнээҕи туругунан киин куорат гааһынан барар тимир көлөлөөхтөрүн 7 АГЗС  гаас уматыгынан хааччыйар. Итинтэн 4-э –  «Сахатранснефтегаз» АУо киэнэ.

«Маннык дьаһаныы билигин үлэлиир ыстаансыйаларга авто-тыраапыспардар халҕаһаларын тарҕата түһэр кыаҕы биэрэр. Баар балаһыанньа – быстах кэмнээх. Бу чугас эргин күннэргэ, киирбит сайаапкаларга олоҕуран, гаас эбии кээмэйэ чааһынай сапыраапкаларга тиэрдиллиэ. Суоппардарга табыгастаах уонна чуолкай буоллун диэн бу курдук кыраапыгы олохтообуттар:

Күнүскү өттүгэр (06:00–20:00):

- Жатай ПАГЗС-а ( Намныыр тракт, 16 км), төл.: 46-08-13;

- Можайскай уул. 1 баар АГЗС, 31д., төл.: 46-03-80;

- М. Николаев аатынан уул., 16а баар ыстаансыйа төл.: 47-33-52 хааччыйыахтара.

Түүн (20:00–08:00) Бүлүү трагын 4 км,  6Г баар ыстаансыйа үлэлиэ. Билсэр төл.: 36-80-18, 46-03-81.

Гааһынан барар уопсастыбаннай тырааныспар сарсыарда 06:00 – 08:00 чч. Можайскай уул., 31 баар 1-кы АГЗСка кэлэллэр уонна Жатай  ПАГЗС-гар куттар кыраапыктаах.

Күн устата «Сахагазсевер» диэн чааһынай сапыраапкаҕа бастакы уочарат (приоритет бэриллэр) куттар  кыахтаахтар. «Севергаз» ыстаансыйаҕа итиннэ анаан 22:00 чаастан 00:00 диэри кэм бэриллибит.

Итини таһынан Дьокуускайга үс метан сапыраапката үлэлиир. Итинтэн биирэ – Строительнай ырыынактан чугас «Саханефтегазсбыт» киэнэ. Ону тэҥэ тимир көлөлөрү Новопортовской уонна ДСК оройуонугар түстэммит «СахаМетан» ыстаансыйалара хааччыйаллар.

«Оттук кэмин саҕаланыыта буолан, бөдөҥ туһанааччылар уматыкка наадыйыылара улаатар, холобур, чуолаан «Якутскэнерго» тэрилтэ. Министиэристибэ уматыгынан хааччыйааччылары кытта ыкса сибээһи тутар, балаһыанньа хонтуруолланар. «Сахатранснефтегаз» хампаанньаны кытта гаас, мотуор уматыгынан хааччыйыы кээмэйин улаатыннарарын курдук үлэлэһэбит. “ЯТЭК” биир сууккаҕа, ортотунан, 60 т  СУГ оҥорон таһаарар. Итинтэн 40 туонна курдуга – Дьокуускайга, 20 туонната – Бүлүү бөлөх улуустарга барар. Уһун уочаракка түбэспэт гына, «Сахатранснефтегаз» АУо официальнай саайтыгар уонна анал сыһыарыытыгар баар «Мониторинг» баска киирэн, бу кэмҥэ ыстаансыйа төһө ноҕоруускалаах үлэлии турарын билсэр ордук», – диэн сүбэлиир туһааннаах министиэристибэ бырамыысыланнаска департаменын салайааччытын солбуйааччы Михаил Винокуров.