Дьокуускай уулуссаларыттан сыл саҕаланыаҕыттан 1,5 тыһ. ыты туттулар

Дьокуускай куорат дьаһалтата көрүүтэ-истиитэ суох сылдьар ыттары тутар тэрээһиннэри тохтообокко ыытар.

Ол курдук, Дьокуускайдааҕы ЕДДС, территориятааҕы салайар уорганнар, СӨ бэтэринээрийэ управлениетын уонна дьаһалта территориялары кытта үлэлиир департаменын үлэһиттэрэ бэйдиэ сылдьар ыттары тутарга суһал ыстааптара күннэтэ күүһүрдүллүбүт эрэсииминэн үлэлиир. Кэлим дьуһуурунай диспетчер сулууспатыгар киирбит сайаапкалар уонна социальнай ситимнэргэ иһитиннэриилэр тутатына бэрэбиэркэлэнэн, ыйыллыбыт сирдэргэ ыты тутар биригээдэлэр үлэлииллэр.

Бүгүҥҥү күн туругунан икки бэдэрээтчит 5 биригээдэтэ үлэлиир: «Помоги выжить» пуондаттан – 2 биригээдэ уонна көрүүтэ-истиитэ суох сылдьар кыыллары кытта үлэлэһэр сулууспаттан – 3 биригээдэ. Бу туһунан Олохтоох дьаһалта территориялары кытта үлэлиир департамена иһитиннэрэр.

Куорат уулуссаларыгар хаһаайына суох ыт көҥүл сылдьарын территориялар салайар уорганнара (ТОУ) кэтээн көрөллөр. ТОУ-ларга ыты тутарга аналлаах 30 сохсо баар.

Сыл саҕаланыаҕыттан уопсайа 1517 бэйдиэ сылдьар ыт тутуллубут. Бигэргэммит кыраапык быһыытынан эриэйдэлиир үлэ салҕанар. Ону тэҥэ чааһынай сектор олохтоохторун дьиэ кыылыгар эппиэтинэстээхтик сыһыаннаһалларыгар сэрэтэр үлэ сиэринэн бэсиэдэлэр ыытыллаллар, памяткалар тиксэриллэллэр.

Ааспыт нэдиэлэҕэ Дьокуускай куоракка территорияны салайар уорганнар исписэлиистэрэ кыттыылаах 4 эриэйдэлиир тэрээһин Автодорожнай, Сайсары, Киин уокуруктарга уонна Хатас бөһүөлэгэр ыытыллыбыт. Ону сэргэ 9 бэсиэдэ ыытыллыбыт, 40 памятка түҥэтиллибит. Бу курдук нэһилиэнньэҕэ сэрэтэр үлэнэн тахсыы сыл саҕаланыаҕыттан 156-та оҥоһуллубут, дьиэ кыылын тутааччылары кытта 404 бэсиэдэ ыытыллыбыт.

Дьиэ кыылын тутуу быраабылатын кэһии иһин СӨ КоАП 1-кы ч. 5.4 ыст. административнай быраабы кэһиигэ 141, СӨ КоАП 2-с ч. 5.4 ыст. – 2 боротокуол толоруллубут. Оттон дьиэ кыылын тутуу ирдэбилин кэһиигэ РФ КоАП 3-с ч. 8.52 ыст. – 21.

Хаартыска: Олохтоох дьаһалта сайтыттан