Дьокуускай уонна Ленин...

Муус устар 22 күнэ - В.И. Ленин төрөөбүт күнэ. 
Ааспыт үйэ 1957 сылыгар диэри Дьокуускайга «Ленин болуоссата» диэн билиҥҥи Орджоникидзе аатынан болуоссат биллэрэ. 
Ити сылтан «Ленин болуоссата» оччотооҕу «Октябарьскай» уулусса киин болуоссатыгар, ол эбэтэр билиҥҥи миэстэтигэр көһөр. Ааспыт 2024 сыл олунньу 26 күнүгэр буолан ааспыт Куорат дууматын уочараттаах XIV сессиятын быһаарыытынан Ленин болуоссата икки чааска үллэһиллэн, аҥаара, саҥа өттө, «Өрөспүүбүлүкэ болуоссата» диэн ааттаммыта, «Ленин болуоссата» диэн аата пааматынньыктаах өттүгэр хаалбыта.
Оттон куорат киин уулуссата 18-с үйэҕэ «Иркутский тракт» диэн ааттааҕа. 19-с үйэҕэ уулуссаны «Большая» дииллэр. 20-с үйэҕэ, икки өрөбөлүүссүйэ чиэһигэр, бастаан, аҕыйах хонукка, «Февральскай» диэн ааттанар, онтон «Өктөөп өрөбөлүүссүйэтин уулуссата» буолар, ол кэннэ дьэ өр сылларга «Октябрьскай» диэн ааты сүгэр. Билиҥҥи «Ленин проспега» диэн аатын 1962 сылтан сүгэр. 

1957 сыл алтынньы 4 күнүгэр Саха сирэ Арассыыйа састаабыгар көҥүл өттүнэн киирбитэ 325, Улуу Өктөөп Өрөбөлүүссүйэтин 40 сылларынан куорат дьокутааттара Дьокуускайга пролетариат улуу сирдьитигэр пааматынньык боппуруоһун туруораллар. Сир-дойду үрдүнэн Сталин пааматынньыктарын көтүрүү кэмэ этэ. 
Инньэ гынан 1957 сыл күһүнүгэр Гостинай двор миэстэтигэр Ленин  пааматынньыгын туруорарга бэлэмнииллэр. Онтон миэстэтин болуоссат ортотугар көһөрөллөр уонна 1960 сыллаахха туталлар. Бу пааматынньыгы сотору көтүрэн, Култуура уонна сынньалаҥ пааркатыгар көһөрөллөр, онтон Ньурба улууһугар ыыппыттар диэн суруйаллар. 
Онон билиҥҥи Ленин пааматынньыга – Дьокуускай куоракка турбут Лениҥҥэ аналлаах иккис пааматынньык – 1967 сыл алтынньы 25 күнүгэр туруоруллар. Ааптардар: архитектордар С.С. Ожегов, Н.Н. Миловидов уонна скульптор Ю.Д. Стручков. Туһаныллыбыт сигэ: https://meridian-journal.ru/site/article3f38/

Хаартыска: АГиП