Дьокуускай уонна ДНР: сибээс бөҕөргүүр
Бэс ыйын 26-27 күннэригэр Дьокуускайга Донецкай норуодунай өрөспүүбүлүкэ дэлэгээссийэтэ ыалдьыттаата.
Тэрээһин чэрчитинэн «Дьокуускай-Донецкай: быһа кэпсэтии» төгүрүк остуол ыытылынна. Манна үөрэх тэрилтэлэрин салайааччылара, учууталлар, историктар, учуонайдар, үөрэнээччилэр, ыччат, анал байыаннай дьайыы кыттыылаахтарын дьиэ кэргэттэрэ кытыннылар. Байыастар, волонтердар, Донбасс олохтоохторугар көмө арааһын оҥорор тэрилтэлэр бэрэстэбиитэллэрэ болҕомто киинигэр буоллулар.
Анна Бурляй, Арассыыйатааҕы «Знание» уопсастыба лектора, Донецкайдааҕы судаарыстыбаннай университет филологияҕа факультетын деканын солбуйааччы:
– Дьокуускай сахалыы тыыннаах, ураты эйгэлээх куорат дии санаатым. Холобур, Сэбиэскэй Сойуус биллэр-көстөр диэйэтэллэрин ааттарын сүгэр уулуссаларга сахалыы символлары көрөҕүн, хардыы аайы саха тылын истэҕин.
Саха сирэ ыччатын Ийэ дойдутугар бэриниилээх буоларга иитэрин бэлиэтии көрдүм. Үөрэнээччилэри кытта көрсүһүүгэ нуучча остуоруйаларын, ону тэҥэ саха эпоһын ахтан аастыбыт. Онон ыалдьыт быһыытынан олус астынным, Саха сирин олус сөбүлээтим. Арассыыйа сүүнэ улахан дойду буоларын илэ харахпынан итэҕэйдим.
«Дьокуускай-Донецкай: быһа кэпсэтии» төгүрүк остуол туһунан этэр буоллахха, мин санаабар, олус интэриэһинэй кэпсэтии таҕыста. ДНР төрүттэниитин туһунан методическай босуобуйалары таһаарар олус наадалааҕын, үөрэнээччилэргэ ону хайдах тиэрдэр, сөптөөх өйдөбүлү иҥэрэр сүбэ-соргу баар буолуохтааҕын туһунан этиилэри ордук сэргээтим.
Түмүктээн эттэххэ, тэрээһиҥҥэ бары өттүнэн киэҥ ис хоһоонноох кэпсэтии таҕыста. Инникитин бииргэ үлэлэһэр, сибээһи өссө бөҕөргөтөр сорук турда.
Бэйэ кэр.
Сонуннар
Ордук ааҕаллар
