Дьокуускай уһуйааннарыгар үтүө холобур

Бэс ыйын 11 күнүгэр 18 бөлөхтөөх 23 №-дээх “Сардаана” уһуйааҥҥа “Оҕо Ыһыаҕа” сахалыы сиэргэ-туомҥа олоҕуран ыытылынна. Уһуйаан 2020 сыллаахха арыллыаҕыттан үлэтэ сайдыы суолун батыһан, билигин барыта 521 оҕону оскуола иннинээҕи үөрэхтээһиҥҥэ иитэр-сайыннарар. Быйыл уһуйаантан 117 выпускник оскуолаҕа киириэҕэ.  

“Оҕо Ыһыаҕын” тэрээһинин “Сардааналар” көннөрү сахалыы көр-күлүү, ырыа-үҥкүү бырааһынньыгын эрэ курдук буолбакка, саха төрүт култууратын, үгэстэрин кэлэр көлүөнэҕэ тиэрдэр сыал-сорук туруоруммуттара хайҕаллаах уонна Дьокуускай атын уһуйааннарыгар үтүө холобур буолар суолталаах. 2026 сыл – Култуура ону сэргэ Оскуола иннинээҕи үөрэхтээһиҥҥэ анаммыт сыл буоларынан, уһуйаан кэллэктиибэ уонна төрөппүттэр сүбэлэрин холбоон, турунан туран ыһыахтарын бэрт интэриэһинэйдик, үрдүк таһымнаахтык тэрийэн ыыттылар.

Ыһыахха оҕолор сахалыы төрүт дьарыктарга холонон көрдүлэр. Холобур, уолаттар от оттооһун, мас мастааһын, балыктааһын арааһын, маһынан уһаныыны, ат сүүрдүүтүн билистилэр. Хомуур күрэххэ, кириэс тэбиигэ күрэстэстилэр. Иитээчилэр этэллэринэн, уолаттар эр киһи дьарыгар сыстаҕастарын, айылҕаны кытта ситимнээхтэрин, кинилэргэ маннык үлэ-хамнас, төрүт дьарык уйулҕаларыгар барсарын, саха үлэтэ-хамнаһа оҕо өй-санаа, эт-хаан өттүнэн сайдыытыгар олус сөп түбэһэрин, төһүү буоларын көрдөрдүлэр. Кыргыттар олбох, чаппараах сыһыардылар, алаадьы астаатылар, баттах өрдүлэр, илиинэн араас оҥоһуктары айан таһаардылар – дьиэ кэргэн ийэтин, дьахтар сүрүн дьарыктарын билистилэр –  кыргыттары кыра эрдэхтэн маннык үлэҕэ-хамнаска сыһыардахха оҕо сатабыллаах, олоххо бэлэм, ыраас өйдөөх-санаалаах буола улаатар.

Оҕолор астына оонньоон, бэйэлэригэр өбүгэ үгэһин туһунан элбэх билиини иҥэринэн, оттон төрөппүттэр оҕону сахалыы тыыҥҥа ииттэххэ бары өттүнэн туһалааҕын өйдөөн, элбэҕи толкуйданан тарҕастылар. Маннык хабааннаах тэрээһиннэр иитэр-үөрэтэр суолталара кэлэр көлүөнэҕэ үтүө сабыдыаллааҕын бары өйдүөх тустаахпыт. "Сардаана" уһуйаан үлэһиттэригэр, төрөппүттэригэр, оҕолоругар куорат  атын уһуйааннарыгар үтүө холобур буолбуккутугар махтал!