Дьокуускай саҥа Устааба ылыллыахтаах

Альберт Семенов биир идэлээхтэригэр Устаап барыла ситэриллэн куорат мээригэр, Прокуратураҕа, РФ Юстиция министиэристибэтин Саха сиринээҕи управлениетыгар уонна Хонтуруоллуур-ааҕар-суоттуур палаатаҕа ыытыллыбытын. Тустаах уорганнар этиилэрин, эбии киллэриилэрин уонна туох түмүгү биэрэллэрин кэтэһэллэр.

Санатан этэххэ, билиҥҥи Устаабы Дьокуускай уокуруктааҕы Сэбиэтэ 2007 сыллаахха ылынан турар. Ол кэмтэн элбэх уу суккуллан аастаҕа. Ону кытта тэҥинэн, ханнык баҕарар докумуоҥҥа курдук, федеральнай, өрөспүүбүлүкэ саҥа ылыммыт сокуоннарыгар сөп түбэһиннэрэн, элбэх уларыйыы, эбии-сабыы киирбитэ.

Гордуума дьокутааттара бэлэмнээбит Устааптарын барыла билиҥҥини солбуйуохтаах уонна олохтоох бэйэни салайыныыны тэрийиигэ сыһыаннаах ирдэбиллэргэ эппиэттэһэр буолуохтаах. Устаап барыла, этиллибитин курдук, сөпсөһүннэрии, эбии-сабыы түһүмэҕин бара сылдьар. Ону барытын түмэн, быһаарсан, силигин ситэрэн, толорон баран, дьокутааттар саҥа Устаап барылын публичнай иһитиннэриигэ таһаарыахтаахтар. Ону истэн, билсэн баран, олохтоохтор эмиэ бэйэлэрин этиилэрин, санааларын тиэрдэр бырааптаахтар.