Дьокуускай үөрэнээччитэ Бүтүн Арассыыйатааҕы форумҥа ситиһиилэннэ

Айыына билим улахан түһүлгэтигэр «Перевязочно-фиксирующее устройство при травмах костей и мягких тканей» диэн аныгы медицинаҕа тоҕоостоох тиэмэнэн кытынна. Чинчийэр үлэтин эксперт сүбэтэ үрдүктүк сыаналаан, хас да наҕарааданан бэлиэтэннэ: «Биомедицинская техника» сиэксийэҕэ I истиэпэннээх диплом, маны сэргэ «Медицина технологиятын эйгэтигэр бастыҥ үлэ» муҥутуур кыайыылааҕа, «Шаг в будущее» бырагыраама улахан научнай мэтээлэ, Арассыыйа наукаларын академиятын диплома.

Бу иннинэ Айыына өрөспүүбүлүкэтээҕи «Инникигэ хардыы» НПК-ҕа бастаабыта, ону таһынан «Общественный выбор» күрэххэ кыайбыта уонна Саха сиринээҕи доруобуйа харыстабылын каадырабай киинин анал бирииһин ылбыта.

Экспертэр бэлиэтээбиттэринэн, Айыына үлэтэ сонун, кэскиллээх, аныгы медицина сайдыытыгар дьоһун кылааты киллэрэр кыахтаах. Кини толкуйдаабыт тэрилэ оһолломмут дьоҥҥо бастакы көмөнү оҥорорго туттуллуон уонна ону эмтииргэ көдьүүстээх буолуон сөп. Айыына научнай салайааччыта – Наталья Владимировна Габышева, научнай консультана – Сергей Петрович Васильев.

«Биһиги Айыына ситиһиитинэн киэн туттабыт! Бу кыайыы улахан үлэнэн, дьаныарынан, дьүккүөрүнэн уонна билиигэ дьулууһунан ситиһилиннэҕэ. Талааннаах үөрэнээччини өйүүр учууталларыгар уонна уһуйааччыларыгар, кини сайдарыгар кылааттарын уурбут төрөппүттэригэр ураты махталбытын тиэрдэбит. Бу үлэ олоххо уонна медицинаҕа туттуллар кыахтааҕа ордук суолталаах. Айыынаҕа билимҥэ саҥа арыйыылары, инники өттүгэр кыайыылары баҕарабыт!» – диэтэ Дьокуускай куорат Үөрэххэ управлениетын начаалынньыга Мария Петрова.