Дьокуускай оскуолаларыгар пионердары көрсүөххэ сөп

Дьокуускай куорат 26, 16, 10 №№-дээх уо.д.а. оскуолаларыгар пионер хаалтыстаах үөрэнээччилэри көрсүөххэ сөп.
«Киин куорат» бу туһунан билигин бу эйгэҕэ 2007 сылтан үлэлии сылдьар баһаатайы кытта кэпсэттэ.

Людмила Оконешникова, СӨ старшай пионер баһаатайа, ыччат политикатын туйгуна, Н.К. Крупская аатынан уордьан кавалера:

– Ыам ыйын 19 күнэ – Пионерия күнэ. Бу үөрүүлээх күҥҥэ быйыл 26 №-дээх оскуола тэлгэһэтигэр оҕолору пионерга ыллыбыт. Оҕо саас биир умнуллубат түгэнигэр октябренок, пионер аатын чиэстээхтик сүгэр оҕо аймах кыттыыны ылла. Бастакы кылаастан ахсыс кылаастарга тиийэ баһаатайынан үлэлээбит оҕолорум патриотическай ырыанан кытыннылар. Бу оҕолор сыл аайы Кыайыы параадыгар кытталлар. Быйыл, хомойуох иһин, маннык параадтарга тэҥҥэ хаамсыбыт АБДь хонуутугар охтубут Вадим Зенякиҥҥа кэриэстэбил мүнүүтэни анаатыбыт.

Мин Дьокуускай куорат 16, 10 нүөмэрдээх оскуолаларыгар баһаатайдыыбын. Оскуолаҕа пионерга киириэн баҕалаах оҕо элбэх. Сыл аайы пионерга ылабыт. Урукку өттүгэр Ленин болуоссатыгар ылар этибит.
Билигин пионерга киириигэ хааччах элбэх. Манна төрөппүт, кылаас салайааччытын, администрация сөбүлэҥин ааһан киирэллэр, оҕо баҕа санаата эрэ учуоттаммат.
Мин оҕолорго, инники көлүөнэҕэ бу үлэбинэн болҕомтобун уурабын.
Биһиги Саха сиригэр бэйэбит пионердардаах, баһаатайдардаах, кинигэлэрдээх буоламмыт, пионерскай тэрилтэбит историятын үчүгэйдик билэбит. Ол курдук, бүгүҥҥү күҥҥэ 8 улуус кинигэтэ таҕыста.

Быйыл кулун тутар ыйга бэйэм үөрэммит Дүпсүн оскуолатын Пионерията төрүттэммитэ 100 сылын туолла. Манна анаан оскуолабар кылаас чаастарын ыытан кэлбитим олус долгутуулааҕа.

Бииргэ үлэлиир 16-с оскуолам пионердарын төрөппүттэрэ тыл көтөҕөннөр, сыл аайы Пионерия күнүн ыытабыт. Сэбиэскэй кэмҥэ пионер саастара ааспыт 1992 сыллааҕы выпускниктар миигин кытта бииргэ тутуһан ыытыһаллар. Манна, анал балаһыанньаҕа олоҕуран, сааскы айылҕаҕа спортивнай хабааннаах, флешмобтаах, сарсыардааҥҥы пионерскай саһарҕаны көрсөр слет үрдүк таһымнаахтык буолар. Онон бу слету быйыл төрөппүттэрбиниин төрдүс төгүлүн ыытаары сылдьабыт.

Өссө икки сыл аҕам саастаах кырдьаҕастарга аналлаах «Назад в СССР» диэн лааҕыр тэрийэн турардаахпыт. Бу саамай элбэх пионердаах, комсомоллаах Горнай улууһугар буолбута. Онон пионерскай-пенсионерскай лааҕыры үлэлэппиппит диэххэ сөп.
Дьэ ити курдук пионер диэн ааты билигин да биһиги ортобутугар үрдүктүк тутар оҕолордоохпут диэн этэбит.