Дьокуускай олохтооҕун 100 сааһынан эҕэрдэлээтилэр

Үйэ саастаах үбүлээргэ үлэ уонна социальнай сайдыы миниистирэ Елена Волкова дойду баһылыга Владимир Путин эҕэрдэ телеграмматын, итиэннэ Ил Дархан аатыттан «Үйэ саас» Бочуоттаах бэлиэни туттарда. Дьокуускай куорат Олохтоох дьаһалтатын аатыттан ытык кырдьаҕаһы куорат баһылыгын солбуйааччы Владимир Аржаков эҕэрдэлээтэ.

Роза Петровна Попова Өлүөхүмэ улууһун II Нөөрүктээйититтэн төрүттээх. Институту бүтэрэн баран дойдутугар математика учууталынан, салгыы райисполком бэрэссэдээтэлин солбуйааччынан, үөрэх салаатын инспекторынан үлэлээбит. Кэргэнэ Николай Дмитриевиһы кытта үс кыыс оҕолоохтор. Роза Петровнаны билигин биэс сиэнэ, түөрт хос сиэнэ тулалыыллар.

Үйэ сааһын томточчу туолбут ытык кырдьаҕас уһун үйэлэнии кистэлэҥин күн аайы тугу эрэ гынарга дьулуһарынан быһаарар. «Эдэр сылдьан уопсастыба, дьон, үлэ көдьүүһүн улаатыннарар туһунан саныырбыт», - диир кини.

Санатар буоллахха, Саха Өрөспүүбүлүкэтигэр үйэ саастарын туолбут ытык кырдьаҕастарга 1 мөл. солк. кээмэйдээх биир кэмнээх төлөбүр көрүллэр. Дьокуускай куорат дьаһалтата 100 тыһ. солк. туттарар.

Бэлиэтээн эттэххэ, Саха сиригэр бүгүн 100 уонна онтон аҕа саастаах 21 ытык кырдьаҕас олорор, диэн Ил Дархан уонна Бырабыыталыстыба пресс-сулууспата иһитиннэрэр.