Дьокуускай мастарын эрбиэххэ сөп... өскөтүн көҥүллээх буоллахха

Бүгүн сарсыарда, кулун тутар 24 күнүгэр, «Киин куорат» эрэдээксийэтигэр куорат олохтооҕо кэлэн, тутуу ыытыллар былаһааккатын таһыгар икки киһи хаарыан бэйэлээх хатыҥнары эрбээн эрэллэрин кэпсээтэ.

Хатыҥчаан барахсан...

– Тиийэн ыйыталаһааччы буоллум, тоҕо баччалаах үчүгэй мастары эрбииргэ соруммутарын. Икки эдэркээн киһи мастар олбуор тутарга мэһэйдииллэр үһү диэтилэр уонна, киһи кыһыйыах, «ааһа тур» диэтилэр. Онуоха мин: «Оттон эһиги салалта бирикээһин эрэ толорор дьон буоллаххыт. Үүнэн турар маһы Дьокуускай территориятыгар кэрдэргэ анал көҥүл ирдэнэрин билэҕит дуо? Көҥүллээххит дуо?» – диэн чопчуластым. Онуоха уолаттар көҥүллээхтэрин уонна саҥа эрбээри гыммыттара эрбиилэрэ үлэлээбэт буолан хаалтын эттилэр. Сотору буолан баран иккистээн эргиллэн кэлтим, номнуо дьыалаларын оҥорон баран тэскилээбиттэр. Ол иһин бу эһиэхэ кэллим, – диэн ааҕааччыбыт бүгүн сааскы сарсыардатын аймаабыт сонунун үллэһиннэ.

Бары билэрбит курдук, Дьокуускай куоракка үүнэн турар маһы кэрдиэхтээҕэр, оннооҕор өлбүт маһы эбэтэр мэһэйдиир лабаалары көҥүлэ суох ылан кэбиһэр көҥүллэммэт – маныаха официальнай докумуон ирдэнэр. Чуолаан Олох-дьаһах хомунаалынай хаһаайыстыбатын уонна куорат энергетикэтин салаатыттан көҥүл ылыахха наада. Онто суох бу дьайыы сокуону кэһиинэн ааҕыллар.

Номнуо онно да хаалбатах...

Бу түгэнинэн «Киин куорат» Дьокуускай куорат Олохтоох дьаһалтатын Олох-дьаһах хомунаалынай хаһаайыстыбатын уонна энергетикэ департаменыгар тахса сырытта.

Олох-дьаһах хомунаалынай хаһаайыстыбатын уонна энергетикэ департаменын начаалынньыга Иван Негнюров:

– Киин куорат 53-с кыбартаалыгар элбэх кыбартыыралаах олорор дьиэлэри тутууну ыытар ЖСК хампаанньаҕа 3 хатыҥы, 7 үөтү уонна 2 харыйаны кэрдэргэ 2025 сыл алтынньы 30 күнүгэр көҥүл ылбыта. Онон бу түгэҥҥэ сокуону кэһии суох.

Этиллибитин курдук, буруйдаахха быраабы кэһии иһин ыстараап уонна хоромньуну сабар эбээһинэс  сүктэриллэр – биир мас оннугар 50 саҥа маһы олордуу. Бу туһунан административнай регламент Дьокуускай куорат Олохтоох дьаһалтатын 16.04.2015 №108п балаһыанньатынан бигэргэммитэ. Оттон көҥүл ылан баран кэрдии иһин «оһорор», ол эбэтэр мас олордор эппиэтинэс суох. Арааһа, ити түгэни хаттаан көрүөххэ баара. Дьокуускай куоракка мас олордор, олордуу мас ылсар бары кыһалҕатын, көрсүллэр ороскуотун, сыратын учуоттаан.

Куорат олохтоохторо! Күөх үүнээйини алдьатыы, кэрдии түгэннэрин биллэрэргэ: Дьокуускай к., Дзержинскэй уул., 21, төл.: 40-23-09.

Көҥүлү Дьиэ-уот-хомунаалынай хаһаайыстыба уонна энергетика департаменыгар ирдэнэр докумуоннары кытта сайабылыанньа суруйан ылыахха сөп. Онно Дьокуускай куорат дьаһалтата 2015 сыл муус устар 16 күнүгэр 108п № -дээх (2021 с. атырдьах ыйын 13 к. эрэдээксийэлэммит) уурааҕынан бигэргэтиллибит «Дьокуускай куорат» куораттааҕы уокурук сиригэр-уотугар күөх үүнээйини кэрдиигэ көҥүлү биэриигэ муниципальнай өҥөнү оҥоруу административнай регламеныгар ыйыллыбыт докумуоннар толору кэмпилиэктэрэ ирдэнэр.

Санатар буоллахха, Губин уонна Богатырев уулуссаларын быһа охсуһууларыгар ЖСК хампаанньа үс 16 уонна биир 9 мэндиэмэннээх түөрт баараҕай дьиэни тутан эрэр. Тутуу бастакы уочарата 2026 сыл III кыбаарталыгар үлэҕэ киирээри, номнуо кыбартыыралар атыыга тахсыбыттар. Хаалбыт үс дьиэ 2027, 2028 уонна 2029 сс. үлэҕэ киирэллэрэ былааннанар.